ပြည်တွင်းသတင်း

စကခမှူးဟာ စစ်တပ်ကချီးမြှင့်တဲ့ စွမ်းရည်ဆိုင်ရာဘွဲ့တွေ (၂)ကြိမ်ခန့် ရထားသူဖြစ်

ပဲခူးတိုင်း၊ ပန်းတောင်းမြို့နယ်အတွင်း စစ်တပ်စစ်ကြောင်းကို အာရက္ခတပ်တော်(AA)ရဲ့ ကွန်မန်ဒို အဖွဲ့က ဝင်ရောက်တိုက်ခိုက်ရာမှာ သေဆုံးခဲ့ရတဲ့ ဗိုလ်မှူးကြီးအဆင့်ရှိသူဟာ စကခ(၁၀)စကခမှူး ဗိုလ်မှူးကြီး ဟန်လင်းအောင်ဖြစ်ပြီး သူ့ရဲ့အလောင်းလက်နက်တွေကိုလည်း AA က သိမ်းဆည်းရရှိခဲ့တယ်လို့ သိရပါတယ်။

ပြီးခဲ့တဲ့ ဇန်နဝါရီလ ၄ ရက် မနက် ၉ နာရီခန့်မှာ ပန်းတောင်းမြို့နယ်၊ ညောင်ကျိုးအတွင်း ၆၆၆ ကုန်းနဲ့ ကပစ ၁၆ ကြား၊ မသုန်ရွာအနောက်ဘက် မီတာ ၅၅၀၀ ခန့်မှာ စခန်းချနေတဲ့ စကခ(၁၀) စကခမှူး ဦးဆောင်တဲ့ စစ်ကြောင်းကို အာရက္ခတပ်တော်(AA)ရဲ့ ကွန်မန်ဒိုစစ်ကြောင်းများက ဝင်ရောက်တိုက်ခိုက်ခဲ့ပြီး တိုက်ပွဲအတွင်း စကခ(၁၀) စကခမှူး ဗိုလ်မှူးကြီး ဟန်လင်းအောင်အပါအဝင် စစ်ကောင်စီတပ်သား (၁၀)ဦးကျော်
သေဆုံးခဲ့သလို အလောင်းလက်နက်တွေကိုလည်း AAက သိမ်းနိုင်ခဲ့တယ်လို့ သိရပါတယ်။

အဆိုပါတိုက်ခိုက်မှုဟာ မိနစ်(၃၀)ကျော်သာ ကြာမြင့်ခဲ့ပေမဲ့ တိုက်ပွဲမှာ တပ်စွဲထားတဲ့ စစ်ကောင်စီစစ်ကြောင်းအတွင်းမှ ရာထူးအကြီးဆုံးဖြစ်သူ စကခမှူးကို ရှင်းလင်းနိုင်ခဲ့ပြီး အာရက္ခတပ်တော်က အထိအခိုက်နည်းစွာနဲ့ ပြန်လည်ဆုတ်ခွာနိုင်ခဲ့တယ်လို့လည်း သိရပါတယ်။

အဆိုပါ စကခမှူး ဗိုလ်မှူးကြီး ဟန်လင်းအောင်ဟာ စစ်တက္ကသိုလ်အပတ်စဥ်(၄၃)မှ ဖြစ်ပြီး စကခ(၁၀) စကခမှူး မဖြစ်ခင်က ကော့သောင်းမြို့ စစ်ဗျူဟာမှူးအဖြစ် တာဝန်ထမ်းဆောင်ခဲ့သူဖြစ်တယ်လို့ CDM ဗိုလ်မှူးတစ်ဦးက BBM ကိုအတည်ပြုပြောဆိုပါတယ်။

“ခုသေတဲ့ စကခ(၁၀) စကခမှူး ဟန်လင်းအောင်က DSA (၄၃)ကပါ၊ တပ်မမှူး မဖြစ်ခင်က ကော့သောင်း စစ်ဗျူဟာမှူးလုပ်ခဲ့တယ်၊ အဲ့ကမှ တပ်မမှူးဖြစ်လာတာပါ”လို့ ပြောပါတယ်။

ဒါ့အပြင် အဆိုပါတပ်မမှူးဟာ သူ့ရဲ့အပတ်စဥ်ဖြစ်တဲ့ စစ်တက္ကသိုလ် အပတ်စဉ်(၄၃) မှာလည်း အစောဆုံး တပ်မမှူးဖြစ်ခဲ့သူဖြစ်သလို စစ်ခေါင်းဆောင်တွေ ချီးမြှင့်ထားတဲ့ စွမ်းဆောင်ရည်ဆိုင်ရာ ဘွဲ့တွေကိုလည်း (၂)ကြိမ်လောက်အထိ ရရှိဖူးသူဖြစ်တယ်လို့လည်း အဆိုပါ ဗိုလ်မှူးက ဆက်ပြောပါတယ်။

“သူ့အပတ်စဥ်မှာဆိုရင် အရင်ဆုံး တပ်မမှူးဖြစ်တဲ့သူပေါ့၊ ပြီးတော့ စစ်ခေါင်းဆောင်တွေပေးတဲ့ စွမ်းရည်ဆိုင်ရာဘွဲ့တွေလည်း (၂)ခါလောက်ရဖူးတဲ့သူပါ” လို့ ပြောပါတယ်။

ရခိုင်ပြည်နယ် စစ်မျက်နှာတွေမှာ အခုဖြစ်စဥ်သာမက ရှေ့ပိုင်းတွေမှာလည်း မြောက်ဦး၊မောင်းတော၊ ဂွ နဲ့အမ်းမြို့အပါအဝင် အခြားတိုက်ပွဲတွေအတွင်း စစ်ကောင်စီရဲ့ တပ်မမှူးအဆင့်ရှိသူတွေနဲ့ အရာရှိကြီးအဆင့်တွေပါ သေဆုံးဖမ်းဆီးခံရတဲ့ ဖြစ်စဥ် အမြောက်အများရှိခဲ့ဖူးပါတယ်။

ဒီလိုအရာရှိကြီးအဆင့်တွေပါ သေဆုံးတာတွေ သုံ့ပန်းဖြစ်နေတာတွေနဲ့ပတ်သက်ပြီး ရခိုင်စစ်မြေပြင်အတွင်းမှာ တပ်အတွင်း အောက်ခြေသာမက အရာရှိကြီးအဆင့်တွေပါ ပြုန်းတီးမှုများပြားနေသလို စစ်ချီရာမှာလည်း ဖရိုဖရဲဖြစ်နေတဲ့အပြင် ဖွဲ့စည်းပုံပျက်နေတယ်လို့ တပ် CDM အသိုင်းအဝိုင်းက သုံးသပ်ပြောဆိုထားကြပါတယ်။

ကချင်ပြည်နယ် ပူတာအိုမြို့ကိုပို့မဲ့ စစ်ကောင်စီရဲ့ လေယာဥ်ဆီနဲ့ဒီဇယ်ဆီတွေတင်ဆောင်လာတဲ့ ကား(၂)စီးကို မြစ်ကြီးနား-ပူတာအိုလမ်းပိုင်းမှာ တော်လှန်ရေးအင်အားစုတွေက ဖမ်းဆီးနိုင်ခဲ့တယ်လို့မြေပြင်သတင်းရင်းမြစ်တွေထံမှ သိရပါတယ်။

ပြီးခဲ့တဲ့ ဒီဇင်ဘာလ(၂၆)ရက်နေ့က မြစ်ကြီးနား-ပူတာအိုလမ်းပိုင်းတစ်နေရာရှိ ပူတာအို-PDFတွေ တာဝန်ကျနေတဲ့ ဂိတ်စခန်းတစ်ခုအနီး စစ်ကောင်စီအတွက် လေယာဥ်ဆီတွေနဲ့ ဒီဇယ်ဆီတွေ သယ်ဆောင်လာတဲ့ အရပ်သားကား(၂)စီးကို ပြည်သူတွေရဲ့သတင်းပေးချက်အရ တားဆီိးစစ်ဆေးနိုင်ခဲ့တယ်လို့သိရပါတယ်။

အဆိုပါအရပ်သားကားတွေကို စစ်ဆေးရာမှာ လေယာဥ်ဆီ တိုင်ကီ(၅၀)၊ဒီဇယ်ဆီ တိုင်ကီ (၇၀)နဲ့ စုစုပေါင်း တိုင်ကီ(၁၂၀)အထိပါရှိတယ်လို့ သိရပြီး အဆိုပါဆီတိုင်ကီတွေအားလုံးကို တော်လှန်ရေးအင်အားစုတွေဘက်က သိမ်းဆည်းလိုက်တယ်လို့ မြေပြင်သတင်းရင်းမြစ်တစ်ဦးက BBM ကိုပြောပါတယ်။

“မြစ်ကြီးနား-ဆွမ်ပရာဘွမ်-ပူတာအို ကားလမ်းပိုင်းမှာ ပြည်သူတွေသတင်းအတိအကျပေးလို့ စကစ ရဲ့ဆီသယ်ယာဥ်(၂)စီးကိုရရှိလိုက်တယ်ဗျ၊စုစုပေါင်း ဆီတိုင်ကီ၁၂၀ပါတယ်၊ လေယာဥ်ဆီ ၅၀နဲ့ ဒီဇယ်ဆီ ၇၀ “

အဆိုပါ ဆီတိုင်ကီတွေဟာ ပူတာအိုမြို့နယ်အတွင်းမှာရှိတဲ့ စစ်ကောင်စီဗျူဟာ ၄၆ ထံပို့ဆောင်ပေးရမဲ့ တိုင်ကီတွေဖြစ်ပြီး ပူတာအိုPDFအနေနဲ့ ယခုအကြိမ်အပါအဝင် (၂)ကြိမ်
အထိပင် စစ်ကောင်စီရဲ့ ဆီတင်ကားတွေကို ဖမ်းဆီးရမိတာတွေရှိနေတယ်လို့လည်း သိရပါတယ်။

ပူတာအို-PDFအနေနဲ့ နွေဦးတော်လှန်ရေးစတင်ကတည်းက ယနေ့အချိန်ထိ မဟာမိတ်တော်လှန်ရေးအင်အားစုတွေနဲ့ပူးပေါင်းပြီးမြေပြင်စစ်ကြောင်းမှတဆင့် စစ်ကောင်စီကိုတိုက်ခိုက်နေသလို ဆွမ်ပရာဘွမ်-ပူတာအိုလမ်းပိုင်းမှာလည်း စစ်ကောင်စီယာဥ်တန်းတွေကို မိုင်းခွဲတိုက်ခိုက်တာတွေ မကြာခဏပြုလုပ်လေ့ရှိတယ်လို့လည်း သိရပါတယ်။

အထိနာနေတဲ့ စစ်တပ်အနေနဲ့ လိုင်ဇာဌာနချုပ်ကို အသေခံဒရုန်းများနဲ့ တိုက်ခိုက်

ဗန်းမော်မြို့ထိုးစစ်ကို မြှင့်တင်လိုက်ပြီးနောက် KIA အနေနဲ့ ဗန်းမော်မြို့ စစ်မျက်နှာရှိ စစ်စခန်းအမြောက်အများနဲ့ လက်နက်အမြောက်အများကို သိမ်းပိုက်ရရှိခဲ့တဲ့အပြင် ဒရုန်းနဲ့ တိုက်ခိုက်မှုအတွင်းမှာလည်း စစ်ကောင်စီတပ်ဖွဲ့ဝင် အမြောက်အများသေဆုံးခဲ့တယ်လို့ ဗန်းမော်မြို့ရှေ့တန်းမှ မြေပြင်ရဲဘော်တွေရဲ့အတည်ပြုပြောဆိုချက်အရ သိရပါတယ်။

ဒီနေ့ ဒီဇင်ဘာလ ၂၅ ရက်(ခရစ္စမတ်နေ့) မနက်အစောပိုင်းမှစပြီး KIA အနေနဲ့ ဗန်းမော်ရှိ စစ်ကောင်စီနဲ့ ဆိုင်ထားတဲ့ စစ်မျက်နှာတွေအားလုံးကို တစ်ပြိုင်တည်း ထိုးစစ်အရှိန်မြှင့်တင်ခဲ့တာကြောင့် တိုက်ပွဲတွေပြင်းထန်စွာဖြစ်ပွားနေတယ်လို့ သိရပါတယ်။

အဆိုပါတိုက်ပွဲတွေအတွင်း စစ်ကောင်စီနေရာယူထားတဲ့ စစ်မျက်နှာအတော်များများကို KIA က ရရှိလိုက်တဲ့အပြင် စစ်ကောင်စီသုံး လက်နက် အမြောက်အများကိုလည်း သိမ်းဆည်းနိုင်ခဲ့ပြီး မြေပြင်စစ်ရေးအခြေအနေကောင်းမွန်နေတယ်လို့ သိရပါတယ်။

ဒါ့အပြင် မြေပြင်ထိတွေ့မှုတွေသာမက လေကြောင်းမှ တော်လှန်ရေးတပ်ဖွဲ့တွေရဲ့ အသေခံဒရုန်းတွေနဲ့ တိုက်ခိုက်မှုတွေမှာလည်း စစ်ကောင်စီတပ်သား အမြောက်အများသေဆုံးခဲ့ရတယ်လို့ ဗန်းမော်ရှေ့တန်းစစ်မျက်နှာမှ ရဲဘော်တစ်ဦးက BBM ကိုပြောပါတယ်။

“ဒီနေ့ ထိုးစစ်တွေအကုန်ပြန်စတယ်၊ နေရာတော်တော်များများပြန်ရပြီ၊ လက်နက်လည်းအများကြီးသိမ်းရတယ်၊ အသေခံဒရုန်းနဲ့ ခွေးတွေ (စစ်သား) အတော်လေးထိတယ်၊ Vide၀ file ရှိတယ်၊ ခုပဲဆော်လိုက်တာ၊ တပြိုင်တည်းတိုက်တော့ တော်တော်ပွဲပျက်နေတယ်ဗျာ၊ ဒီမနက်တင် လက်နက်တော်တော်လေးသိမ်းရတယ်” လို့ ရဲဘော်တစ်ဦးက ပြောပါတယ်။

ဒါတင်မက ဗန်းမော်တိုက်ပွဲအတွင်း စစ်စခန်းတွေသိမ်းပိုက်နိုင်တာနဲ့ လက်နက်ခဲယမ်း သိမ်းနိုင်တာတွေနဲ့ပတ်သက်ပြီး နောက်ထပ် ဗန်းမော်မြို့အခြားစစ်မျက်နှာမှ ဒဏ်ရာရရှိပြီး ဆေးကုသမှုခံယူနေတဲ့ ရဲဘော်တစ်ဦးကလည်း BBM ကိုအတည်ပြုပြောဆိုပါတယ်။

“ဗန်းမော်ကတော့ ဒီနေ့စပြီးတော့ တိုက်တယ်လို့ သိရတယ်ဗျ၊ ဒီနေ့မနက်အစောပိုင်းလောက်ကတော့ တခြားအဖွဲ့တွေတော့မသိဘူး ကျွန်တော့်ရဲဘော်တွေကတော့ ကျွန်တော်တို့ဘက်အခြမ်းမှာ၊ ဒီကောင်တွေရဲ့နေရာကော၊ လက်နက်ခဲယမ်းတွေကော သိမ်းဆည်းရမိတာရှိတယ်ဗျ”လို့ ပြောပါတယ်။

ဒါ့အပြင် ဗန်းမော်မြို့ထိုးစစ်နဲ့ တချိန်တည်းမှာ မြစ်ကြီးနားမြို့ပေါ်ရှိ လေတပ်စခန်းဌာနချုပ်ကို KIA က တိုက်ခိုက်ခဲ့တာကြောင့် ရဟတ်ယာဥ်တစ်စီးနဲ့ တိုက်လေယာဥ်တစ်စီးတို့ ထိခိုက်ပျက်စီးခဲ့တယ်လို့လည်း သိရပါတယ်။

ဒီလို တစ်ရက်အတွင်းမှာတင် ဗန်းမော်စစ်မျက်နှာမှာရော၊ မြစ်ကြီးနားလေတပ်စခန်းဌာနချုပ်မှာပါ အထိနာခဲ့တဲ့အတွက် စစ်ကောင်စီက အသေခံဒရုန်းတွေနဲ့ KIA ဌာနချုပ်ရှိရာ လိုင်ဇာမြို့ကို ဝင်ရောက်တိုက်ခိုက်ခဲ့တယ်လို့လည်း အဆိုပါရဲဘော်က ဆက်ပြောပါတယ်။

“မြစ်ကြီးနားဘက်ကအဖွဲ့တွေချတာလည်း ရဟတ်ယာဥ်တစ်စီးနဲ့ Fighter တစ်စီး ထိခိုက်သွားတယ်လို့ သိရတယ်၊ ဒီကောင်တွေအကုန်လုံး ဝိုင်းပြီးကြုံးတော့ နည်းနည်းထိလို့နဲ့တူတယ်၊ လိုင်ဇာထဲကိုတောင် အသေခံဒရုန်းတစ်စီး ဝင်လာပြီး လာချသွားတယ်”လို့ ဆိုပါတယ်။

တကျော့ပြန် စစ်ရှိန်မြှင့်တက်လာတဲ့ ဗန်းမော်မြို့နဲ့ မြစ်ကြီးနားတို့အပါအဝင် ကချင်ပြည်နယ်မှ စစ်ရေးအခြေအနေတွေနဲ့ပတ်သက်ပြီး KIA သတင်းပြန်ကြားရေးဌာန ဗိုလ်မှူးကြီး နော်ဘူကို ဆက်သွယ်ထားပေမဲ့ လက်ရှိအချိန်ထိ အကြောင်းပြန်ကြားခြင်းတော့ မရှိသေးပါဘူး။

KIA ဦးဆောင်တဲ့တော်လှန်ရေးအင်အားစုတွေအနေနဲ့ စကခ(၂၁)ဌာနချုပ်ရှိရာ ဗန်းမော်မြို့ကို ပြီးခဲ့တဲ့နှစ် ဒီဇင်ဘာလကတည်းက စတင်ထိုးစစ်ဆင်တိုက်ခိုက်ခဲ့တာဖြစ်ပြီး အရေးကြီး စစ်စခန်းနေရာတွေကို သိမ်းပိုက်ထားနိုင်ခဲ့တယ်လို့ သိရပါတယ်။

စစ်ကောင်စီဘက်ကလည်း သြဂုတ်လဆန်းပိုင်းမှစပြီး ပိတ်ဆို့ခံထားရတဲ့ ဗန်းမော်မြို့ကို ရေကြောင်းမှတဆင့် လူ၊ လက်နက်၊ ရိက္ခာတွေ ဖြည့်တင်းခဲ့ပြီး ခုခံကာကွယ်ခဲ့ပေမဲ့လည်း အထိနာမှုတွေရှိနေတယ်လို့ သိရပါတယ်။

စစ်ကိုင်းတိုင်း၊ ၀က်လက်မြို့နယ် အရှေ့မြောက်ခြမ်း၊ ထုံးဘိုရွာတောင်ဘက်ရှိ စစ်ရှောင်ပြည်သူတွေနေထိုင်ရာ နေရာကို စစ်ကောင်စီတပ်က ဂျက်ဖိုက်တာ ၂ စီးနဲ့ ဗုံးကြဲတိုက်ခိုက်ခဲ့တယ်လို့ Wetlet Informational Network ရဲ့တာ၀န်ရှိသူက BBM ကိုပြောပါတယ်။

ဒီဇင်ဘာလ ၂၄ ရက်၊ နေ့လယ် ၁၁ နာရီ ၂၄ မိနစ်နဲ့ ၃၃မိနစ်မှာ ထုံးဘိုရွာတောင်ဘက်ရှိ သန်းကုန်းတော်တိုက်အနီးကို စစ်ကောင်စီရဲ့ ဂျက်ဖိုက်တာ၂ စီးက ကလက်စတာဗုံးသီး ၁၂ လုံးနဲ့ကြဲချခိုက်ခဲ့တာပါ။

အဆိုပါ နေရာဟာ စစ်ရှောင်တွေနေထိုင်တဲ့နေရာသာဖြစ်ပြီးတော့ ဒီဇင်ဘာလ တစ်လထဲမှာပဲ ၃ ကြိမ်တိတိ တိုက်ခိုက်ခံခဲ့ရတယ်လို့ ဆိုပါတယ်။

“လက်ရှိ အဲဒီမြောက်ဘက်မှာ ကျောက်မြောင်း ခမရ ၁၂ နဲ့ မခေါက်ဟင်္သာကြီးဘက်မှ ပျူတွေပေါင်းပြီး တောင်ဘက်ကို စစ်ကြောင်းထိုးထားတယ်ဗျ၊ လက်ရှိ ထုံးဘိုကြီးမြောက်ဘက် မန်ကျည်းသုံးပင်မှာ ခွေးတွေရောက်နေတယ်၊ အဲ့ကျတော့ စစ်ဘေးရှောင်တွေလည်း ထွက်ထားတယ်ဗျ၊ ဆိုတော့ အထိအခိုက်နည်းမယ်ဗျ”လို့ အဆိုပါ တာ၀န်ခံက ဆိုပါတယ်။

အဆိုပါ လေကြောင်းတိုက်ခိုက်မှုကြောင့် စစ်ဘေးရှောင်တွေ ထိခိုက်သေဆုံးမှုအတိအကျကိုတော့ BBM အနေနဲ့ ဆက်သွယ်မေးမြန်း‌ထားဆဲဖြစ်ပါတယ်။

“သူတို့(စကစ) အတွေးကတော့ အဲ့နားလေးမှာ တော်လှန်ရေး အင်အားစုတွေရှိတယ်ပြီး ကြဲတာဗျ”လို့ သူက ဆက်ပြောပါတယ်။

စစ်ကောင်စီတပ် လေကြောင်းတိုက်ခိုက်ခဲ့တဲ့နေရာဟာ တိုက်ပွဲဖြစ်ပွားတဲ့နေရာမျိုးမဟုတ်ဘဲ ပြည်သူတွေ စစ်ဘေးရှောင်နေရာသာဖြစ်ပြီး ဒီတစ်ကြိမ်နဲ့ဆိုရင် ၃ကြိမ်မြောက်ဖြစ်တယ်လို့ ဆိုပါတယ်။

စစ်ကောင်စီတပ်ဟာ ဒီဇင်ဘာလ ၁၃ ရက်၊ ၁၉ ရက်တွေမှာလည်း ထုံးဘိုရွာတောင်ဘက်ကို လေကြောင်းတိုက်ခိုက်ခဲ့ပါသေးတယ်။

ဒီဇင်ဘာလ ၁၉ ရက်မှာ လေကြောင်းတိုက်ခိုက်မှုကြောင့် စစ်ဘေးရှောင် ၄ နှစ်သားကလေးငယ်အပါအ၀င် ၄ ဦးသေဆုံးပြီး ၁၀ဦး ထိခိုက်ဒဏ်ရာရရှိခဲ့တယ်လို့ သိရပါတယ်။

ပုံ-wetlet informational network

အာရက္ခတပ်တော် AA နဲ့ ပူးပေါင်းမဟာမိတ်တပ်တွေ သိမ်းပိုက်ထားတဲ့ ပဲခူးတိုင်း၊ ပန်းတောင်းမြို့နယ်မှ ပွိုင့် ၆၆၆ စခန်းကုန်းကို စစ်ကောင်စီတပ်က စစ်ကြောင်းထိုး ထိုးစစ်ဆင်လာတာကြောင့် AA က ကြားဖြတ်တိုက်ခိုက်ခဲ့ရာ ဗိုလ်မှူးတစ်ဦးအပါအဝင် စစ်ကောင်စီတပ်သား ၈၀ ခန့် သေဆုံးမှု ရှိတယ်လို့ စစ်ရေးသတင်းရင်းမြစ်တွေဆီက သိရပါတယ်။

စစ်ကောင်စီတပ်ဟာ ကပစ ၁၆ စက်ရုံကနေ မသုံကျေးရွာအထိစစ်ကြောင်းထိုးလာဖြစ်ပြီး အဲဒီကနေတဆင့် AA နဲ့ ပူးပေါင်းတပ်တွေ သိမ်းထားတဲ့ ပွိုင့် ၆၆၆ စခန်းကုန်းကို အင်အား ၃၀၀ နဲ့ ထပ်မံထိုးစစ်လာခဲ့တာဖြစ်တယ်လို့ AA နဲ့ နီးစပ်တဲ့စစ်ရေးသတင်းရင်းမြစ်ဆီက သိရပါတယ်။

ပြီးခဲ့တဲ့ ဒီဇင်ဘာလ ၂၂ ရက်မှာ စစ်ကောင်စီတပ်ဟာ အင်အား ၃၀၀ နီးပါးနဲ့ ပွိုင့် ၆၆၆ စခန်းကုန်းကို စစ်ကြောင်းထိုးလာတာဖြစ်ပြီး AA က စနိုက်ဘာ၊ လက်နက်ကြီးတွေနဲ့ ပစ်ခတ်တိုက်ခိုက်ခဲ့တာကြောင့် ဗိုလ်မှူးတစ်ဦး အပါအဝင် စစ်ကောင်စီတပ်သား ၈၀ ခန့် သေဆုံးမှုရှိတယ်လို့ AA နဲ့ နီးစပ်တဲ့စစ်ရေးသတင်းရင်းမြစ်က BBM ကို ပြောပါတယ်။

“ဗိုလ်မှူးတစ်ယောက် ရလိုက်တာမှန်ပါတယ်၊ အင်အား ၃၀၀ လောက်နဲ့ ထိုးလာတာပါ အဲတာကို AA က တိုက်ခိုက်တော့ စစ်ကောင်စီသား ၈၀ နီးပါးလောက် ရလိုက်တာရှိပါတယ်၊ ဒီဇင်ဘာလ ၂၂ ရက်နေ့က ရလိုက်တာပါ၊ ဒီပွိုင့် ၆၆၆ စခန်းကုန်းကို ထိုးလာတဲ့ စစ်ကောင်စီတပ်သားတွေ ဖြစ်ပါတယ်” လို့ အဆိုပါ စစ်ရေးသတင်းရင်းမြစ်က ပြောပါတယ်။

အဆိုပါ ပွိုင့် ၆၆၆ စခန်းကုန်းကို ထိုးလာတဲ့ စစ်ကောင်စီ စစ်ကြောင်းဟာ အထိအခိုက်အကျအဆုံးတွေ များပြားတာကြောင့် မသုန်ကျေးရွာဘက်ကို ပြန်လည်ဆုတ်ခွာသွားကြတယ်လို့လည်း သိရပါတယ်။

ပန်းတောင်းမြို့နယ်ရှိ ကပစ ၁၆ စက်ရုံရဲ့ ကာကင်းစခန်းတစ်ခုဖြစ်တဲ့ ပွိုင့် (၆၆၆) စခန်းကုန်းကို ပြီးခဲ့တဲ့ အောက်တိုဘာလ ၁၄ ရက်မှာ အာရက္ခတပ်တော် AA က အပြီးသတ်သိမ်းပိုက်ရရှိခဲ့ပြီးနောက် စစ်ကောင်စီတပ်ဟာ မသုန်ချောင်းရဲ့ တစ်ဘက်ခြမ်းမှ မြောက်ဘက်ကုန်းကျေးရွာအနီးမှာ လက်နက်ကြီးစခန်းတွေ ပြုလုပ်ပြင်ဆင်နေခဲ့တာလည်း ဖြစ်ပါတယ်။

AA နဲ့ ပူးပေါင်းတပ်တွေ သိမ်းထားတဲ့ ပွိုင့် ၆၆၆ စခန်းကုန်းကနေ ကပစ ၁၆ စက်ရုံကို ထိုးစစ်အမြန်ရောက်ရှိဖို့ နီးကပ်တာကြောင့် စစ်ကောင်စီတပ်ကလည်း အင်အားအများအပြားနဲ့ အဲဒီ ပွိိုင့် ၆၆၆ စခန်းကို တန်ပြန်ထိုးစစ်ဆင်တိုက်ခိုက်လာနေတာ ဖြစ်တယ်လို့ စစ်ရေးသတင်းရင်းမြစ်တွေဆီက သိရပါတယ်။

“အဲဒီ ပွိုင့် ၆၆၆ စခန်းကုန်းဘက်ကို ထိုးစစ်ဆင်ဖို့အတွက် စကစတပ်သားတွေကို စစ်အင်အားပို့ဆောင်ရင်လည်း စိတ်ဓာတ်တွေကျဆင်းပြီး ထွက်ပြေးကြမှာပါ၊ တောမှာမသုံ၊ မြို့မှာရန်ကုန်ဆိုသလိုပဲ တကယ်ကို မသုံဘက်တွေက တောလည်းနက်ပါတယ်၊ အဲတာကြောင့် မသုံဘက်ကိုထိုးနေတဲ့ စစ်ကြောင်းတွေက ထွက်ပြေးကြမှာသေချာပါတယ် ” လို့ CDM ဗိုလ်ကြီးဇင်ယော်က သုံးသပ်ပါတယ်။

အခြားတစ်ဘက်မှာလည်း စစ်ကောင်စီတပ်ဟာ ပန်းတောင်းမြို့နယ်ရှိ ကပစ ၆ စက်ရုံကနေ AA သိမ်းထားတဲ့ ညောင်ကျိုးစခန်းကို အင်အားအများအပြားနဲ့ ထိုးစစ်ဆင်လာတာကြောင့် ဆင်လန်းကျေးရွာအနီးတဝိုက်တွေမှာ တိုက်ပွဲတွေပြင်းထန်စွာဖြစ်ပွားနေကြတယ်လို့လည်း သိရပါတယ်။