ပြည်တွင်းသတင်း

ဒုတိယသမ္မတများ ရွေးချယ်ရေးအစည်းအဝေး ပြုလုပ်မဲ့ ဒီကနေ့ တရက်တည်းမှာပဲ တပ်ချုပ်၊ ဒုတပ်ချုပ် ပြောင်းလဲခန့်အပ်တဲ့အခမ်းအနားကို ပြုလုပ်လျက်ရှိရာ တပ်ချုပ်အဖြစ် ဗိုလ်ချုပ်ကြီး ရဲဝင်ဦးခန့်လိုက်ပြီး ဒုတပ်ချုပ်အဖြစ် ဗိုလ်ချုပ်ကြီး ကျော်စွာလင်းကို ခန့်လိုက်တယ်လို့ သိရပါတယ်။

မတ်လ ၃၀ ရက်နေ့၊ နေပြည်တော်၊ ဇေယျာသီရိ ဗိမ္မာန်မှာ စစ်ကောင်စီ တပ်ချုပ်၊ ဒုတပ်ချုပ် ပြောင်းလဲခန့်အပ် တာဝန်ပေးတဲ့အခမ်းအနား ပြုလုပ်နေပြီး မကြာသေးမီက ကြည်းတပ် စစ်ဦးစီးချုပ် ခန့်လိုက်တဲ့ ဗိုလ်ချုပ်ကြီး ရဲဝင်းကို တပ်ချုပ်အဖြစ်ခန့်အပ်လိုက်တယ်လို့ စစ်ကောင်စီ မီဒီယာတွေက ဖော်ပြထားပါတယ်။

ဒါ့အပြင် ညှိနှိုင်းကွပ်ကဲရေးမှူး (ကြည်း၊ ရေ၊လေ) တာဝန်ယူထားတဲ့ ဗိုလ်ချုပ်ကြီး ကျော်စွာလင်းကို ဒုတပ်ချုပ်အဖြစ် ခန့်အပ်လိုက်တာဖြစ်ပြီး ညှိနှိုင်းကွပ်ကဲရေးမှူးအဖြစ် ဒုတိယဗိုလ်ချုပ်ကြီး ကိုကိုဦးကို ခန့်အပ်လိုက်တယ်လို့ သိရပါတယ်။

တဖက်မှာလည်း ဒုသမ္မတ များ ရွေးချယ်ရေးအစည်းအဝေးတွေကိုလည်း ပြုလုပ်လျက်ရှိပြီး စစ်ဗိုလ်ချုပ်ဟောင်းတွေပဲ ဥက္ကဌ နေရာယူထားတဲ့ လွှတ်တော်နှစ်ရပ်ဖြစ်တဲ့ ပြည်သူ့လွှတ်တော်ကိုယ်စားလှယ်အဖွဲ့၊ အမျိုးသားလွှတ်တော်ကိုယ်စားလှယ်အဖွဲ့နဲ့ ၂၅ ရာခိုင်နှုန်းနေရာယူထားတဲ့ စစ်တပ်ကိုယ်စားလှယ်များအဖွဲ့ တို့က ဒုသမ္မတလောင်း ၁ ဦးစီ အဆိုပြုရမှာဖြစ်ပါတယ်။

အဆိုပါ စစ်အုပ်စုတွေပဲ ကြီးစိုးဖွဲ့စည်းထားတဲ့ အစုအဖွဲ့ ၃ ဖွဲ့က အမည်စာရင်းရွေးချယ်တဲ့ ဒုသမ္မတ ၃ ဦးထဲက ၁ ဦးကို သမ္မတအဖြစ် ထပ်မံရွေးချယ်မှာဖြစ်ပြီး ကျန် ၂ ဦးကတော့ ဒုသမ္မတ (၁)နဲ့ (၂) ဖြစ်လာမှာပဲ ဖြစ်ပါတယ်။

သမ္မတနေရာကို စစ်ခေါင်းဆောင် မင်းအောင်လှိုင်က ရယူမယ်လို့ နိုင်ငံရေးလေ့လာသူတွေက သုံးသပ်ထားကြတဲ့အပြင် တပ်တွင်းသတင်းတွေလဲ ကျယ်ကျယ်ပြန့်ပြန့်ထွက်ပေါ်နေတာဖြစ်ပြီး ဒါဟာ စစ်ယူနီဖောင်းမှ အရပ်ဝတ်လဲကာ သမ္မတတက်လုပ်ဖို့အတွက် မင်းအောင်လှိုင်ရဲ့ အစီအစဉ်တကျပြင်ဆင်လာခဲ့တဲ့ အခင်းအကျင်းတွေပဲဖြစ်ပါတယ်။

စစ်ခေါင်းဆောင် မင်းအောင်လှိုင်ရဲ့ သားဖြစ်သူ အောင်ပြည့်စုံနဲ့ ချွေးမဖြစ်သူ မျိုးရတနာထိုက်တို့ဟာ ထိုင်းနိုင်ငံ၊ ဘန်ကောက်မြို့ရှိ တန်ဖိုးကြီးဇိမ်ခံအိမ်ရာတစ်ခုကို အမေရိကန်ဒေါ်လာ ၃ သန်းခန့်နဲ့ ဝယ်ယူခဲ့တယ်လို့ Justice For Myanmar (JFM) က အထောက်အထားများနဲ့တကွ ဖော်ထုတ်လိုက်ပါတယ်။

အဆိုပါ ဝယ်ယူမှုကို စစ်အုပ်စုရဲ့ လက်နက်ပွဲစား ခရိုနီဖြစ်သူ ထွန်းမင်းလတ်က ကြားခံညှိနှိုင်းပေးခဲ့ခြင်းဖြစ်ပြီး၊ ၂၀၂၂ ခုနှစ်အတွင်း စစ်ကောင်စီက ပြည်သူများအပေါ် အကြမ်းဖက်စစ်ဆင်ရေးများ အရှိန်မြှင့်လုပ်ဆောင်နေချိန်မှာ အခုလို ဒေါ်လာသန်းချီတန်တဲ့ အိမ်ရာတွေကို ဝယ်ယူခဲ့ကြတာဖြစ်ပါတယ်။

အခုဝယ်ယူခဲ့တဲ့ အဆင့်မြင့်အိမ်ရာမှာ Issara Residence, Rama 9 စီမံကိန်းမှာ ရှိပြီး ဒဏ်ခတ်ပိတ်ဆို့မှုတွေကို ရှောင်လွှဲနိုင်ဖို့အတွက် ပိတ်ဆို့မှုမခံထားရသေးတဲ့ ချွေးမဖြစ်သူ မျိုးရတနာထိုက်ရဲ့ အမည်ကို အသုံးပြုပြီး စာချုပ်ချုပ်ဆိုခဲ့ခြင်း ဖြစ်နိုင်တယ်လို့ JFM က သုံးသပ်ထားပါတယ်။

ဒါ့အပြင် ထိုင်းနိုင်ငံရဲ့ ဥပဒေအရ နိုင်ငံခြားသားတွေ မြေယာပိုင်ဆိုင်ခွင့် တားမြစ်ချက်ကို ရှောင်လွှဲဖို့အတွက် Emerald Princess အမည်ရှိ ရုပ်ပြကုမ္ပဏီတစ်ခုကို အိမ်ရာပိုင်ဆိုင်မှု လွှဲပြောင်းခြင်းမပြုမီ တစ်ပတ်အလိုမှာ အလျင်အမြန် တည်ထောင်ခဲ့တာကိုလည်း တွေ့ရှိခဲ့ရတယ်လို့ သိရပါတယ်။

အဆိုပါ ရုပ်ပြကုမ္ပဏီ လိပ်စာမှာ အိမ်ခြံမြေရောင်းချတဲ့ Charn Issara ကုမ္ပဏီရဲ့ ရုံးချုပ်လိပ်စာအတိုင်း ဖြစ်နေပြီး ဒါရိုက်တာမှာလည်း Charn Issara ရဲ့ ထိပ်တန်းအမှုဆောင်တစ်ဦး ဖြစ်နေတဲ့အတွက် အိမ်ခြံမြေကုမ္ပဏီကိုယ်တိုင်က စစ်ခေါင်းဆောင်မိသားစုရဲ့ ပိုင်ဆိုင်မှုတွေကို ဖုံးကွယ်ပေးဖို့ ကူညီခဲ့တယ်လို့ ယူဆရကြောင်း ဆိုပါတယ်။

မင်းအောင်လှိုင် မိသားစုဟာ အဲဒီအိမ်ရာသာမက Belle Grand Rama 9 ကွန်ဒိုမီနီယမ်မှာလည်း ဘတ် သန်း ၂၀ တန် ဇိမ်ခံတိုက်ခန်းတစ်ခန်းကို ပိုင်ဆိုင်ထားတယ်လို့ အရင်ကလည်း ဖော်ထုတ်ခံထားရဖူးပါတယ်။

အဆိုပါကွန်ဒိုအခန်းကို ၂၀၂၄ စက်တင်ဘာလမှာ အခွန်မပေးချေမှုနဲ့ ထိုင်းအာဏာပိုင်တွေက ထိန်းချုပ်ပိတ်ပင်ထားပေမဲ့ သိမ်းဆည်းဖို့ အရေးယူမှုတွေ လိုအပ်နေသေးပါတယ်။

ကြားခံဆောင်ရွက်ပေးသူ ခရိုနီ ထွန်းမင်းလတ်ဟာ အောင်ပြည့်စုံ ကိုယ်စား ငွေပေးချေမှုတွေကို ထိုင်းဘဏ်ကြီး သုံးခုမှတစ်ဆင့် ဆောင်ရွက်ခဲ့ပြီး သူကိုယ်တိုင်လည်း အဆိုပါကွန်ဒိုမှာ တိုက်ခန်း ၃ ခန်း ထပ်မံပိုင်ဆိုင်ထားတယ်လို့ မြေယာမှတ်တမ်းများအရ အတည်ပြုနိုင်ခဲ့ပါတယ်လို့ ဆိုပါတယ်။

JFM အနေနဲ့ ထိုင်းအစိုးရနဲ့ သက်ဆိုင်ရာ အာဏာပိုင်တွေအနေနဲ့ မတရားရရှိထားသော ငွေကြေးတွေနဲ့ ဝယ်ယူထားတဲ့ အဆိုပါ ပိုင်ဆိုင်မှုတွေကို သိမ်းဆည်းဖို့နဲ့ မြန်မာနိုင်ငံမှာ တရားဝင်အစိုးရတစ်ရပ် ပေါ်ထွန်းလာချိန်မှာ ပြန်လည်လွှဲပြောင်းပေးနိုင်ဖို့အတွက် ထိန်းသိမ်းထားသင့်တယ်လို့ တိုက်တွန်းထားပါတယ်။

ဒါ့အပြင် မင်းအောင်လှိုင်ရဲ့ ဇနီးဖြစ်သူ ကြူကြူလှနဲ့ ချွေးမဖြစ်သူ မျိုးရတနာထိုက်တို့ဟာ ဒီနေ့အထိ မည်သည့်နိုင်ငံရဲ့ ဒဏ်ခတ်ပိတ်ဆို့မှုကိုမှ မခံရသေးဘဲ စစ်မိသားစုအတွက် ကယ်ပေါက်ဖြစ်နေတာကြောင့် သူတို့ကိုပါ နိုင်ငံတကာက အရေးယူပိတ်ဆို့ဖို့ JFM က အလေးအနက် တောင်းဆိုထားပါတယ်။

အိန္ဒိယနိုင်ငံ၊ မီဇိုရမ်ပြည်နယ်၊ လောင်တလိုင်မြို့မှာ ရခိုင်ကုန်သည်တစ်ဦး မေ့ကျန်ခဲ့တဲ့ ရူပီး ၁၅ သိန်းကျော်ကို ပြန်လည်အပ်နှံခဲ့တဲ့ သုံးဘီးမောင်းနှင်သူကို ပြည်နယ်ဝန်ကြီးချုပ်က ငွေသားဆုနဲ့ ဂုဏ်ပြုမှတ်တမ်းလွှာ ပေးအပ်ချီးမြှင့်ခဲ့ပါတယ်။

ဒီနေ့ မတ်လ ၁၃ ရက်နေ့၊ မီဇိုရမ်ပြည်နယ်မြို့တော် အိုင်ဇောလ်မှာ ကျင်းပတဲ့ မီဇိုရမ်လူမျိုးတို့ရဲ့ အစဉ်အလာအကြီးမားဆုံးဖြစ်တဲ့ Chapchar Kut ပွဲတော်မှာ ဝန်ကြီးချုပ်ကိုယ်တိုင် တက်ရောက်ပြီး ဂုဏ်ပြုခဲ့တာ ဖြစ်ပါတယ်။

ဂုဏ်ပြုခံရသူမှာ လောင်တလိုင်ခရိုင်၊ အမှတ် (၃) ရပ်ကွက်မှာ နေထိုင်တဲ့ Pu Henry Lalhmingmuana ဆိုသူဖြစ်ပြီး ရူပီး ၁ သိန်း နဲ့ ဂုဏ်ပြုမှတ်တမ်းလွှာကို ချီးမြှင်ခံတာဖြစ်ပါတယ်။

ပြီးခဲ့တဲ့ ၂၀၂၅ ခုနှစ်၊ ဇွန်လ ၁၉ ရက်နေ့က ရခိုင်ကုန်သည်တစ်ဦးဟာ လောင်တလိုင်မြို့အတွင်း Pu Henry ရဲ့ သုံးဘီးကို ငှားရမ်းစီးနင်းခဲ့စဉ် ရူပီး ၁၅ သိန်းကျော် (မြန်မာငွေ သိန်း ၇၀၀ ခန့်) ကို ထည့်ထားတဲ့ အိတ်အမဲတစ်လုံး မေ့ကျန်ခဲ့တာပါ။

ရခိုင်ကုန်သည်ဖြစ်သူမှာ ငွေပျောက်ဆုံး၍ စိတ်ပူပန်နေစဉ်အတွင်း သုံးဘီးသမား Pu Henry က ရခိုင်ကုန်သည်နောက်သို့ လိုက်လံရှာဖွေပြီး ၎င်းငွေသား အားလုံးကို တစ်ပြားမကျန် ပိုင်ရှင်ထံကို ပြန်လည်အပ်နှံခဲ့တာဖြစ်ပါတယ်။

အဆိုပါ လုပ်ရပ်ဟာ မီဇိုရမ်ပြည်နယ်အတွင်း ပြည်သူ လူထုရဲ့ ချီးကျူးမှုကို များစွာရရှိခဲ့ပြီး လူသားချင်းစာနာမှုနဲ့ ရိုးသားမှုကို ပြသရာရောက်တာကြောင့် ပြည်နယ်အဆင့်ထိ အခုလို ဂုဏ်ပြုခြင်းခံခဲ့ရတာလည်း ဖြစ်ပါတယ်။

တိုင်းပြည်အတွက် တကယ်အလုပ်လုပ်သူတွေသာလိုအပ်ပြီး အခွင့်အရေးသမားတွေ၊ နေရာရဖို့ကြိုးစားသူတွေကိုမလိုအပ်တဲ့အပြင် လူငယ်တွေ၊ အမျိုးသမီးတွေကိုနေရာပေးဖို့လိုအပ်တယ်လို့ မင်းအောင်လှိုင်က ဆိုပါတယ်။

မတ်လ(၁၃)ရက်(ဒီနေ့) နေပြည်တော်ရှိ အပြည်ပြည်ဆိုင်ရာ ကွန်ဗင်းရှင်းဗဟိုဌာန (၁) MICC-1 မှာပြုလုပ်တဲ့ မြန်မာ့မျက်နှာစာသစ်ဖိုရမ် (FORUM ON THE DAWN OF A NEW STATE) မှာ အဖွင့်မိန့်ခွန်းပြောကြားရာမှာ စစ်ခေါင်း ဆောင်ဟာအထက်ပါအတိုင်း ထည့်သွင်းပြောကြားလိုက်ခြင်းပဲဖြစ်ပါတယ်။

စစ်ခေါင်းဆောင်အနေနဲ့ အနာဂတ်မှာ တကယ်အလုပ်လုပ်မဲ့ လူငယ်တွေလိုအပ်ကြောင်းကို လူငယ်ဖိုရမ်ပွဲမှာတုန်းက ၎င်းအနေနဲ့ ပြောကြားခဲ့ပြီးသလို လူငယ်တွေ အမျိုးသမီးတွေကိုနေရာပေးရေးအတွက်လည်း အလေးထားစဥ်းစားနေတယ်လို့ ဆိုပါတယ်။

“ကျွန်တော်တို့အနေနဲ့ကတော့ တကယ်အလုပ်လုပ်တဲ့လူတွေ အလုပ်လုပ်မယ့်လူတွေ ကျွန်တော်တို့ လိုပါတယ်။ အခွင့်အရေးသမားတွေ နေရာရဖို့ ကြိုးစားတဲ့သူတွေတော့ မလိုချင်ပါဘူး။ အနာဂတ်မှာ ဒီလို တကယ်လုပ်မဲ့လူတွေ လူငယ်တွေ ကျွန်တော် ပြီးခဲ့တဲ့ ဖိုရမ်မှာလည်းပြောပါတယ်။ လူငယ်တွေ နေရာပေးဖို့ လိုတယ်။ ကျွန်တော် အလေးထား စဉ်းစားပါတယ်။ အမျိုးသမီးတွေရဲ့ အခန်းကဏ္ဍ ကျွန်တော် အလေးထား စဉ်းစားပါတယ်”

ဒါ့အပြင်ပြီးခဲ့တဲ့ ဇန်နဝါရီလမှာ ၎င်းတို့ကျင်းပပြီးစီးခဲ့တဲ့ ရွေးကောက်ပွဲနဲ့ပတ်သတ်ပြီးတော့လည်း ၎င်းအနေနဲ့ မဲလုံးဝခိုးလို့မရအောင်ဆောင်ရွက်ပေးခဲ့တယ်လို့လည်းဆိုပါတယ်။

ဒါကြောင့်အဆိုပါရွေးကောက်ပွဲရလဒ်မှတဆင့် တက်လာတဲ့ လွှတ်တော်ကိုယ်စားလှယ်တွေအနေနဲ့ လိပ်ပြာလုံလုံဖြင့်တက်လာတဲ့ ရွေးကောက်ခံကိုယ်စားလှယ်တွေဖြစ်တယ်လို့လည်း ရဲရဲကြီးအာမခံရဲတယ်လို့လည်း စစ်ခေါင်းဆောင်ကဆက်ပြောပါတယ်။

“ပြီးခဲ့တဲ့ရွေးကောက်ပွဲမှာ လုံးဝကို သန့်ရှင်းတဲ့ ရွေးကောက်ပွဲတစ်ခုဖြစ်အောင်လုပ်ပေးတယ်။ ဘယ်လိုနည်းနဲ့မှ မဲခိုးလို့မရအောင် လုပ်ပေးတယ်။ ခင်ဗျားတို့ လိပ်ပြာလုံတယ် အကုန်လုံး။ ကျွန်တော်ပြောရဲတယ်။ သတ္တိရှိရှိ ကျွန်တော်ပြောရဲတယ်။ ခင်ဗျားတို့ လိပ်ပြာလုံလုံနဲ့ တက်လာတဲ့ ရွေးကောက်ခံ ကိုယ်စားလှယ်တွေဖြစ်တယ်”

ဒါတင်မက နောက်ထပ်လည်း ငွေကြေးသုံးစွဲမှုနဲ့ပတ်သတ်ပြီးချွေတာရန်၊ လောင်စာဆီချွေတာရန်တွေသာမက ပညာရေးဦးစားပေးကိစ္စနဲ့ ပြည်တွင်းစစ်ရှည်ကြာနေတာဟာ တိုင်းရင်းသားလက်နက်ကိုင်တပ်ဖွဲ့တွေကြောင့်ဆိုပြီး ပြောဆိုစွပ်စွဲသွားပါသေးတယ်။

စစ်ကောင်စီအနေနဲ့ ငြိမ်းချမ်းရေးနဲ့ ပညာရေးတို့ကိုတိုးမြှင့်ဆောင်ရွက်မယ်လို့ပြောဆိုနေပေမဲ့ လက်ရှိမြေပြင်မှာတော့ တိုင်းရင်းသားဒေသတွေနဲ့ စာသင်ကျောင်းတွေကို လေကြောင်းမှ ဆက်တိုက်ဗုံးကြဲတိုက်ခိုက်တာတွေ ပြုလုပ်လျက်ရှိပါတယ်။

မြန်မာနိုင်ငံ ရုပ်ရှင်အစည်းအရုံး တည်ထောင်ခြင်း နှစ် ၈၀ ပြည့် အထိမ်းအမှတ်အဖြစ် မင်းမော်ကွန်းမပါဝင်တဲ့“နှင်းဆီ” အဖွဲ့မှ ပြဇာတ်ပုံစံ ဖျော်ဖြေပွဲတစ်ခု ပြုလုပ်ဖို့ရှိတယ်လို့ ရုပ်ရှင်အစည်းအရုံးနဲ့ နီးစပ်တဲ့ သတင်းရင်းမြစ်တွေထံမှ သိရပါတယ်။

လာမဲ့ မတ်လ (၈)ရက်နေ့မှာကျရောက်မဲ့ အဆိုပါနှစ်(၈၀)ပြည့်အထိမ်းအမှတ်မှာ နှင်းဆီအဖွဲ့မှ ဖျော်ဖြေရေးပွဲတစ်ခုပြုလုပ်မည်ဖြစ်ပေမဲ့လည်း အရင်လို အငြိမ့်ပုံစံမဟုတ်ဘဲ ပြဇာတ်ပုံစံဖြင့်ဖျော်ဖြေသွားဖို့ရှိတယ်လို့လည်း သိရပါတယ်။

အဆိုပါဖျော်ဖြေပွဲကို ဒါရိုက်တာ မောင်မျိုးမင်း(ရင်တွင်းဖြစ်) ကဦးဆောင်ကျင်းပတယ်လို့ အမည်ခံထားပေမဲ့လည်း အမှန်တကယ်မှာတော့ နေတိုးအပါ အခြားနှင်းဆီအဖွဲ့ဝင်တွေအကုန်လုံးက ကိုယ့်ဟာကိုယ်သာ ဦးဆောင်စီစဥ်နေခြင်းဖြစ်တယ်လို့ ရုပ်ရှင်အစည်းအရုံးနဲ့ နီးစပ်သူသတင်းရင်းမြစ်တစ်ဦးက BBM ကိုပြောပါတယ်။

“မတ် ၈ရက်နေ့ကျရင် နှင်းဆီအဖွဲ့ကဖျော်ဖြေပွဲရှိတယ်၊ အရင်လိုအငြိမ့်တော့မဟုတ်ဘူး၊ ပြဇာတ်

ပုံစံစီစဥ်ထားတာ၊ ဒါကို မောင်မျိုးမင်း(ရင်တွင်းဖြစ်)က စီစဥ်တယ်ဆိုပြီးနာမည်ထွက်နေပေမဲ့ ကျန်တဲ့ အဖွဲ့သားတွေ ကိုယ့်ဟာကိုယ်

အားတက်သရော လုပ်နေကြတာပဲ၊ သိထားသလောက်ဆို ရုပ်ရှင်အစည်းအရုံးကော၊ ပြန်ကြားရေးကပါ ဖိအားပေးလုပ်ခိုင်းတာမဟုတ်ဘူး၊ ကိုယ့်ဟာကိုယ်လုပ်ကြတာ”

အာဏာသိမ်းပြီးနောက်ပိုင်း နှင်းဆီအဖွဲ့ဝင် သရုပ်ဆောင်မင်းမော်ကွန်း ပြည်သူ့ဘက်ရပ်တည်ပြီးတဲ့နောက် နှင်းဆီ အဖွဲ့မှ အငြိမ့်ကပြတာတွေ၊ ဖျော်ဖြေတာတွေကို ရပ်နားထားခဲ့ပြီး အခုပထမဦးဆုံးအကြိမ်ပြန်လည် စတင်လာခြင်းဖြစ်တယ်လို့လည်း သိရပါတယ်။

ဒါ့အပြင် နှစ်(၈၀)ပြည့်အထိမ်းအမှတ်မှာ နှင်းဆီအဖွဲ့မှ ပြဇာတ်ပုံစံဖြင့် ဦးစွာဖျော်ဖြေရန် စီစဥ်လာခြင်းဟာ ၎င်းတို့အဖွဲ့အပေါ် ပြည်သူတွေလက်ခံနိုင်မလားဆိုတဲ့အနေဖြင့် စမ်းသပ်လိုက်ခြင်းမျိုးဖြစ်နိုင်တယ်လို့လည်း အဆိုပါသတင်းရင်းမြစ်က ဆက်ပြောပါတယ်။

“ဒီလို ပြုလုပ်ခြင်းရဲ့ ရည်ရွယ်ချက်ကတော့ နှင်းဆီအဖွဲ့ ပြန်လာနိုင်မလားဆိုတဲ့ ပထမခြေလှမ်းအနေနဲ့ စမ်းသပ်တဲ့ အနေအထားလို့လည်း မြင်နိုင်ပါတယ်။ အခုချက်ချင်း နှင်းဆီ အငြိမ့်ကို မလုပ်ရဲသေးတဲ့အကြောင်း ကတော့ အဖွဲ့ဝင်တစ်ချို့ မပါဝင်သေးတာ၊ အထူးသဖြင့် မင်းမော်ကွန်း မပါဝင်တာ ကြောင့်လည်း ဖြစ်နိုင်ပါတယ်။ ဒါကြောင့် အခုတော့ ပြဇာတ်နဲ့ စပြီး နောက်ပိုင်းမှ နှင်းဆီ အငြိမ့် ကို ဆက်လုပ်လာနိုင်တယ်ဆိုတဲ့ သဘောမျိုးလည်း ရှိပါတယ်”

ဒါ့အပြင် ဖိအားပေးခံရခြင်းမရှိဘဲ ယခုကဲ့သို့ ပွဲကဖို့ ကြိုးစားခြင်းနဲ့ပတ်သတ်ပြီး နေတိုးအပါ အခြားနှင်းဆီအဖွဲ့ဝင်တွေအပေါ် ဝေဖန်ပြောဆိုမှုတွေရှိနေပြီး နောက်ပိုင်းမှာ မင်းမော်ကွန်းမပါတော့ဘဲ ဆက်လုပ်လာဖို့ရှိနေတယ်လို့လည်း သိရပါတယ်။

ပြီးခဲ့တဲ့ ရွေးကောက်ပွဲ မတိုင်မှီကလည်း စစ်

ကောင်စီကပြုလုပ်တဲ့ ရွေးကောက်ပွဲဝါဒဖြန့်ချီရေး ဇာတ်ကားထဲ ပါဝင်ခဲ့ပြီး တော်လှန်ရေးအပေါ် ပုတ်ခတ်ပြောဆိုမှုတွေ ပြုလုပ်ခဲ့တာကြောင့် နှင်းဆီအဖွဲ့ဝင် နေတိုးအပါ အခြားသရုပ်ဆောင်များစွာကို ပြည်သူတွေဘက်မှ ပြင်းပြင်းထန်ထန် ပြောဆိုဝေဖန်မှုတွေ ပြုလုပ်ခဲ့ပါတယ်။

နိုင်ငံအတွက် ကောင်းမွန်တဲ့ ဆောင်ရွက်ချက်နဲ့အောင်မြင်မှုတွေကို မိမိတို့အစိုးရအနေနဲ့ မျိုးစေ့ချပေးခဲ့ပြီးပြီဖြစ်တဲ့အပြင် အစိုးရအဖွဲ့အစည်းတွေအနေနဲ့ကလည်း ခွဲဝေချထားပေးတဲ့ နိုင်ငံဘဏ္ဍာကို အလေအလွင့်မရှိစေဖို့ဆောင်ရွက်ရန် စစ်ခေါင်းဆောင်မင်းအောင်လှိုင်က ပြောဆိုလိုက်ပါတယ်။

ပြီးခဲ့တဲ့ မတ်လ၆ရက်နေ့က နေပြည်တော်မှာ ပြုလုပ်ခဲ့တဲ့ ဘဏ္ဍာရေးဆိုင်ရာကော်မရှင်အစည်းအဝေးမှာ အဖွင့်အမှာစကားအနေနဲ့ စစ်ခေါင်းဆောင်အနေနဲ့ အထက်ပါအတိုင်းပြောဆိုလိုက်ခြင်း ဖြစ်တယ်လို့ သိရပါတယ်။

ပထမဦးဆုံးအနေနဲ့ ကာလုံကပြုလုပ်ခဲ့တဲ့ ရွေးကောက်ပွဲဟာပြီးဆုံးပြီးနောက် ရွေးကောက်ပွဲကတက်လာမဲ့ အစိုးရကို အာဏာလွှဲပြောင်းပေးမယ်ဖြစ်ပြီး ၎င်းဦးဆောင်ခဲ့တဲ့ အစိုးရအနေနဲ့က ကောင်းမွန်တဲ့ဆောင်ရွက်ချက်တွေ၊ အောင်မြင်မှုတွေကို မျိုးစေ့ချပေးခဲ့ပြီးတာမို့ နောက်တက်မဲ့အစိုးရကိုလည်း အရှိန်မပြတ်ဆက်လုပ်နိုင်ရန် ကဏ္ဍအလိုက် ဦးစားပေးအသုံးစရိတ်တွေကို သတ်မှတ်ပေးခဲ့ရမယ်လို့ စစ်ခေါင်းဆောင်က ဆိုပါတယ်။

ဒါ့အပြင် ဦးစားပေးကဏ္ဍဖြစ်တဲ့ စိုက်ပျိုးရေး၊မွေးမြူရေး၊ စီးပွါးရေးလုပ်ငန်း ဖွံ့ဖြိုးတိုးတက် ရေးတို့အပါ အခြားလိုအပ်ချက်အသုံးစရိတ်များကို စိစစ်လျာထားပေးရမှာဖြစ်ပြီး ခွဲဝေချထားပေးတဲ့ ရန်ပုံငွေတွေကိုအစိုးရအဖွဲ့အစည်းတွေနဲ့က အကျိုးရှိထိရောက်စွာ သုံးစွဲကြရန်သာမက နိုင်ငံတော်ဘဏ္ဍာငွေများ အလေအလွင့်မရှိကြရေး ကြပ်မတ်ဆောင်ရွက်ကြရန်လည်း စစ်ခေါင်းဆောင်က မှာကြားခဲ့တယ်လို့ သိရပါတယ်။

ကမ္ဘာ့နိုင်ငံရေးအခြေအနေတွေကြောင့် လောင်စာဆီချွေတာဖို့အတွက် ပြည်တွင်းရှိ ပုဂ္ဂလိကယာဥ်များအားလုံး စုံရက်များတွင် စုံ နံပါတ်အက္ခရာယာဥ်များ၊ မ ရက်များတွက် မ နံပါတ်အက္ခရာယာဥ်များသာ မောင်းနှင်ရမယ်လို့ စစ်ကောင်စီရဲ့ အမျိုးသားကာကွယ်ရေးနဲ့ လုံခြုံရေးကောင်စီ(ကာလုံ)က ထုတ်ပြန်ခဲ့ပါတယ်။

လက်ရှိ အရှေ့အလယ်ပိုင်းဒေသအတွင်း စစ်ရေးပဋိပက္ခတွေကြောင့် လောင်စာဆီတင်သွင်းတဲ့ သင်္ဘောတွေဟာ ပို့ဆောင်ရာရေလမ်းကြောင်းတစ်လျှောက် အတားအဆီး အဟန့်အတားပိတ်ဆို့မှုတွေရှိနေတယ်လို့ ကာလုံက ဆိုပါတယ်။

ဒါကြောင့် စက်သုံးဆီခြိုးခြံချွေတာရေးနဲ့ ဖူလုံမှုရရှိရေးအတွက် လာမဲ့ မတ်လ၇ ရက်နေ့ကစတင်ကာ EVကား၊ဆိုင်ကယ်တွေကလွဲပြီးကျန်ပုဂ္ဂလိကယာဥ်များ၊ လုပ်ငန်းသုံးယာဥ်များနဲ့ သယ်ယူပို့ဆောင်ရေးယာဥ်များအနေနဲ့ စုံရက်များမှာ စုံ နံပါတ်အက္ခရာပါတဲ့ယာဥ်များ(ဥပမာ2A/4Aစသဖြင့်) ၊ မ ရက်များမှာ မ နံပါတ်ပါတဲ့ယာဥ်များ(ဥပမာ 1A/3Aသာ မောင်းနှင်ရမယ်လို့ သိရပါတယ်။

ဒါပေမဲ့ အများပြည်သူသယ်ယူပို့ဆောင်ရေးယာဥ်တွေ၊ အဌားယာဥ်တွေ၊ စက်သုံးဆီသယ်ယူပို့ဆောင်ရေးယာဥ်တွေ၊ ဆောက်လုပ်ရေးလုပ်ငန်းသုံးယာဥ်တွေ၊ ကုန်စည်ပို့ဆောင်ရေးယာဥ်တွေ၊ လူနာတင်/နိဗ္ဗာန်ယာဥ်တွေနဲ့ စည်ပင်အမှိုက်သိမ်းယာဥ်များအနေနဲ့ကတော့ ပုံမှန်အတိုင်းအသုံးပြုနိုင်တယ်လို့လည်း သိရပါတယ်။

ဒါတင်မက စက်သုံးဆီလုပ်ငန်းရှင်တွေ၊ ပြည်သူတွေအနေနဲ့ စက်သုံးဆီတွေကို ဝယ်ယူစုဆောင်းတာတွေ၊ စျေးနှုန်းမြှင့်တင်တာတွေမပြုလုပ်ရန်နဲ့ သတ်မှတ်ထားတဲ့စည်းကမ်းချက်အားလုံးကို နောက်ထပ်တစ်စုံတစ်ရာထုတ်ပြန်မှုမလုပ်မချင်းအတည်ဖြစ်ရုံသာမက စည်းကမ်းချက်တွေကို မလိုက်နာရင် တည်ဆဲဥပဒေနဲ့ အရေးယူမယ်လို့လည်း စစ်ကောင်စီ အမျိုးသားကာကွယ်ရေးနှင့်လုံခြုံရေးကောင်စီက ထုတ်ပြန်ကြေငြာထားပါတယ်။

#bbmnews#bbm#bbmtv#fuel#car

စစ်ကောင်စီမှ ထုတ်ပြန်လိုက်တဲ့ လွတ်ငြိမ်းချမ်းသာဖြင့် နိုင်ငံတစ်ဝန်း အကျဥ်းထောင်(၂၅)ခုမှ နိုင်ငံရေးအကျဥ်းသူ၊အကျဥ်းသား စုစုပေါင်း (၁၈၉၅)ဦးလွတ်မြောက်လာတယ်လို့ Political Prisoners Network-Myanmar မှ ထုတ်ပြန်ထားပါတယ်။

စစ်ကောင်စီက မတ်လ(၂)ရက်နေ့ တောင်သူ လယ်သမားနေ့ မှာ ပုဒ်မ၅၀(ည)နဲ့ ပုဒ်မ၅၂(က) ဖြင့် အကျဥိးထောင်အသီးသီးမှာ ကျခံနေရတဲ့ နိုင်ကျဥ်းတွေကို ပြန်လွှတ်ပေးခဲ့ခြင်းဖြစ်တယ်လို့ သိရပါတယ်။

PSNM ရဲ့ထုတ်ပြန်ချက်အရ ပေါင်းတည်အကျည်းထောင်၊ သာယာဝတီအကျဉ်းထောင်၊ဒိုက်ဦးအကျဉ်းထောင်၊ မအူပင်အကျဉ်းထောင်၊ကော့သောင်းအကျဉ်းထောင်၊ ပခုက္ကူအကျဉ်းထောင်၊ ကလေးအကျဉ်းထောင်၊ ပြည်အကျဉ်းထောင်၊ သထုံအကျဉ်းထောင်၊ မြိတ်အကျဉ်းထောင်၊ မြစ်ကြီးနားအကျဉ်းထောင်၊အင်းစိန်အကျဉ်းထောင်၊ ရွှေဘိုအကျဉ်းထောင်၊ ကသာအကျဉ်းထောင်၊ ကျိုက်မရောအကျဉ်းထောင်၊သရက်အကျဉ်းထောင်၊ ဟင်္သာတအကျဉ်းထောင်၊ အိုးဘိုအကျဉ်းထောင်၊ ရမည်းသင်းအကျဉ်းထောင်၊ လွိုင်ကော်အကျဉ်းထောင်၊ မြင်းခြံအကျဉ်းထောင်၊ မိတ္ထီလာအကျဥ်း‌ထောင်၊ ပုသိမ်အကျဥ်း‌ထောင်၊ထားဝယ် အကျဉ်းထောင်နဲ့ မိုးညှင်းအကျဥ်း‌ထောင်တို့မှ လွတ်မြောက်လာခြင်းဖြစ်တယ်လို့ သိရပါတယ်။

ဒါ့အပြင် လွတ်မြောက်လာခဲ့ပြီးတဲ့ နိုင်ကျဥ်းအရေအတွက်အသေးစိတ်နဲ့ တိကျခိုင်မှာစေရေးအတွက် ဆက်လက်ကြိုးစားနေပြီး နောက်ဆုံးရရှိတဲ့အချက်အလက်များကို ထပ်မံထုတ်ပြန်သွားမယ်လို့လည်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)မှ ထုတ်ပြန်ကြေငြာထားပါတယ်။