စစ်ရေး

စစ်ကောင်စီတပ်က ထိန်းချုပ်ထားဆဲဖြစ်တဲ့ ရခိုင်ပြည်၊ ကျောက်ဖြူမြို့နယ်က နေရာနှစ်ခုမှာ စစ်ကောင်စီတပ်နဲ့ အာရက္ခတပ်တော် AA တို့ တိုက်ပွဲတွေ ပြင်းထန်နေပြီး နှစ်ဖက်ထိခိုက်ကျဆုံးမှုတွေ ရှိနေတယ်လို့လည်း ဒေသခံစစ်ရေးသတင်းရင်းမြစ်တွေဆီက သိရပါတယ်။

အခု သြဂုတ်လ အစပိုင်းလောက်က မိုးသည်းထန်စွာ ရွာသွန်းမှုနဲ့အတူ ကျောက်ဖြူမြို့နယ်ရှိ ဒုတိယအကြီးဆုံး ရေတပ်စခန်းဖြစ်တဲ့ တောင်မော်ဦးရေတပ်စခန်းနဲ့ ၃ မိုင်အကွာ အဝတောင်ကျေးရွာအနီးမှာ စစ်ကောင်စီတပ်နဲ့ AA တို့ဟာ ထပ်မံတိုက်ပွဲတွေ ဖြစ်ပွားခဲ့တာ ရှိခဲ့တယ်လို့လည်း သိရပါတယ်။

အဆိုပါ တိုက်ပွဲအတွင်းမှာ AA တိုက်ခိုက်မှုကြောင့် စစ်ကောင်စီတပ်ဖက်က အထိအခိုက်အကျအဆုံးတွေ များပြားခဲ့ပြီး သေဆုံးသွားတဲ့ စစ်ကောင်စီတပ်ရဲ့ အရာရှိပိုင်းတွေနဲ့ ဗိုလ်တစ်ချို့ရဲ့ အလောင်းတွေကို တောင်မော်ဦးရေတပ်ကို ပြန်လည်ဆွဲထုတ်သွားပြီး တိုက်ပွဲကြာချိန်မှာလည်း တစ်နာရီကျော်လောက် ကြာမြင့်ခဲ့တယ်လို့ ကျောက်ဖြူ စစ်ရေးသတင်းရင်းမြစ်တစ်ဦးက ပြောပါတယ်။

“တိုက်ပွဲကတော့ ဒီလ ၁ နဲ့ ၂ ရက်နေ့တွေမှာ အဝတောင်ကျေးရွာအနီးမှာ ဖြစ်ပွားခဲ့တာ ရှိပါတယ်။ တောင်မော်ဦးရေတပ်ကနေ စစ်ကြောင်းတွေ နောက်ထပ်တစ်ကြိမ် စနဲဖက်ကိုထိုးလာလို့ ထိတွေ့ဖြစ်ကြတာပါ။ စကစက စစ်ကြောင်းတွေ ထိုးလာရင် တိုက်ပွဲက ဖြစ်ပွားတာရှိပါတယ်။ မထိုးရင်တော့ တိုက်ပွဲတွေ ငြိမ်သက်နေတာမျိုးတွေ ရှိနေတယ်” လို့ အဆိုပါ စစ်ရေးသတင်းရင်းမြစ်က BBM ကို ဆက်ပြောပါတယ်။

AA သိမ်းထားတဲ့ စနဲမြို့ကို စစ်ကောင်စီတပ်က တောင်မော်ဦးရေတပ်စခန်းမှ စစ်ကြောင်းထိုး ထိုးစစ်ဆင်တဲ့အခါ အကျအဆုံးတွေ များပြားနေပေမဲ့လည်း အဲဒီ တောင်မော်ဦး ရေတပ်စခန်းကိုပဲ စကစတပ်က တပ်မ (၁၁) လက်အောက်ခံတပ်ရင်းတွေနဲ့ ဓညဝတီရေတပ်ဌာနချုပ်မှ စစ်ကောင်စီတပ်သား ၄၀၀ ကျော်ကို ထပ်မံအင်အားဖြည့်တင်းထားတယ်လို့လည်း သိရပါတယ်။

တောင်မော်ဦး ရေတပ်စခန်းအနီးမှာ တိုက်ပွဲတွေပြင်းထန်နေကြောင့် အဲဒီတပ်ရင်းတွေက တပ်မိသားစုဝင်တွေဟာ ပြီးခဲ့တဲ့ ဇွန်လ ဒုတိယအပတ်လောက်ကပင် ကျောက်ဖြူမြို့ပေါ်က ခလရ ၃၄ တပ်ရင်းနဲ့ ၊ ဂုံးချိန်တိုက်နယ်ရှိ ခမရ ၅၄၂၊ ၅၄၃ တပ်ရင်းအပါအဝင် ဓညဝတီရေတပ်ဌာနချုပ်ကို ပြောင်းရွှေ့သွားမှုတွေ ရှိနေကြတယ်လို့လည်း သိရပါတယ်။

စစ်ကောင်စီတပ်ဟာ စနဲမြို့နဲ့ ရမ်းဗြဲမြို့နယ်တွေကို စစ်ကြောင်းထိုးဖို့ ခက်ခဲနေတာကြောင့် အရင်ကတိုက်ပွဲတွေ ပြင်းထန်စွာဖြစ်ပွားခဲ့တဲ့ ကျောက်ဖြူမြို့နဲ့ ၇ မိုင်ကျော်အကွာ ဇိုင်ချောင်း၊ သိုင်းချောင်းစတဲ့ ကျေးရွာတွေဖက်မှာလည်း တိုက်ပွဲတွေပြန်လည် ဖော်ဆောင်လာနေတယ်လို့လည်း သိရပါတယ်။

“သိုင်းချောင်းဖက်မှာ တိုက်ပွဲငြိမ်သက်နေတာ ၁ လကျော်လောက်ရှိပါပြီး။ ဒီရက်ထဲမှာပဲ စဖြစ်တယ်လို့ ကြားပါတယ်။ အဲဒီကျေးရွာတွေကို AA က တစ်ချို့တဝက် သိမ်းထားသလို၊ စကစတပ်တွေကလည်း တဝက်လောက်ရယူထားတာရှိပါတယ်။ စကစတပ်ဖက်ကပဲ ဆက်လက်တိုးလို့ တိုက်ပွဲဖြစ်တာလား၊ AA ကပဲ ကျောက်ဖြူမြို့ကို ဦးတည်နေပြီးလားဆိုတာ သေချာမသိရသေးဘူး။ တိုက်ပွဲကတော့ အပြင်းအထန်ဖြစ်နေကြတာပါ” လို့ ကျောက်ဖြူဒေသခံတစ်ဦးက ပြောပါတယ်။

အာရက္ခတပ်တော် AA ဟာ ရခိုင်ကမြို့နယ် ၁၄ ခုကို သိမ်းပိုက်ရရှိပြီးနောက် လက်ကျန်မြို့နယ်တွေဖြစ်တဲ့ စစ်တွေ၊ ကျောက်ဖြူ၊ မာန်အောင်မြို့နယ်တွေကို အခု ၂၀၂၆ ခုနှစ်နဲ့ ၂၀၂၇ ခုနှစ်မကုန်ခင်အတွင်းမှာ မိုးဆုံးမြေဆုံးအထိ ချီတက်တိုက်ခိုက်သွားမယ်လို့ ပြောဆိုထားပေမဲ့ ကျောက်ဖြူစစ်မျက်နှာမှာ AA ရဲ့ စစ်ရေးအရလှုပ်ရှားမှုတွေ သိပ်မတွေ့ရဘူးလိူ့လည်း စစ်ရေးလေ့လာသူတွေဆီက သိရပါတယ်။

ကျောက်ဖြူမြို့မှာ စစ်ကောင်စီတပ်ရဲ့ ဓညဝတီရေတပ်ဌာနချုပ်၊ ခလရ ၃၄၊ ခမရ ၅၄၂၊ ခမရ ၅၄၃၊ အမှတ် ၃၂ ရဲတပ်ရင်း၊ တောင်မော်ကြီး ရေတပ်စခန်း၊ အုံးကျွိန်ရေတပ်ဌာနခွဲ တို့ရှိပြီး ရေတပ်အင်အားကောင်းတဲ့မြို့နယ်တစ်ခုဖြစ်တဲ့အပြင် တရုတ်စီမံကိန်းများစွာတည်ရှိနေတဲ့ မြို့တစ်ခုလည်း ဖြစ်ပါတယ်။

Photos – ပုံဟောင်း

ရခိုင်နဲ့ မကွေးတိုင်းနယ်စပ်က နတ်ရေကန်လေကြောင်းရန် ကာကွယ်ရေးစခန်း ဗျူဟာကုန်းကို စစ်ကောင်စီတပ်က အင်အားဖြည့်တင်းခွင့်မရဘဲ အာရက္ခတပ်တော် AA နဲ့ ပူးပေါင်းတပ်တို့ရဲ့ ကြားဖြတ်တိုက်ခိုက်မှုကြောင့် အကျအဆုံးတွေ များပြားနေပြီးတော့ လေကြောင်းပစ်ကူတွေပါ ရှေ့ဆင့်နောက်ဆင့် ပြုလုပ်လာနေတယ်လို့ AA နဲ့ နီးစပ်တဲ့ မြေပြင်စစ်ရေးသတင်းရင်းမြစ်တွေဆီက သိရပါတယ်။

ပြီးခဲ့တဲ့ ဇူလိုင်လ ၂၅ ရက်နေ့က စစ်ကောင်စီတပ်ဟာ ပဒါန်းတပ်နယ်အတွင်းရှိ အမှတ် ၉၀၅ အမြောက် စစ်ဆင်ရေးကွပ်ကဲမှုဌာနချုပ်မှ စစ်ယာဉ်တန်း အစီးအရေ (၇၀) ကျော်ဟာ အမ်း – ပဒါန်းလမ်းပိုင်း အတိုင်း နတ်ရေကန်ဗျူဟာကုန်းစခန်းကို အင်အားဖြည့်တင်းဖို့ ကြိုးပမ်းခဲ့ပေမဲ့ AA နဲ့ ပူးပေါင်းတပ်တွေရဲ့ တိုက်ခိုက်မှုကြောင့် နောက်ပြန်ဆုတ်သွားခဲ့ရတာလည်း ဖြစ်ပါတယ်။

အဆိုပါ စစ်ယာဉ်တန်းတွေကို AA နဲ့ ပူးပေါင်းတပ်တွေက လက်နက်ကြီး၊ ဒရုန်းတွေနဲ့ တိုက်ခိုက်မှုကြောင့် ယာဥ်တန်းတွေနဲ့ စကစတပ်သားတစ်ချို့ဟာ အထိအခိုက် အသေအဆုံးများပြားခဲ့ပြီး လက်ရှိမှာ စစ်ယာဉ်တန်းတစ်ချို့ဟာ မစခ ၉၀၅ တပ်ရင်းထဲကို ရောက်ရှိနေတာ ရှိနေတယ်လို့လည်း သိရပါတယ်။

နတ်ရေကန်ဗျူဟာကုန်းကို စစ်အင်အား မရောက်ရှိဘဲ အခုလို လက်တစ်ဝက်အရောက်မှာ အတိုက်ခံနေရတာကြောင့် စစ်ကောင်စီတပ်ဟာ ပြီးခဲ့တဲ့ သြဂုတ်လ ၂ ရက်နေ့က နတ်ရေကန်ဗျူဟာကုန်း အနီးအနားက ဂုတ်ကြီး၊ ပဇီ၊ လိုင်ကျေးရွာနဲ့ တော/တောင်တစ်လျှောက်ရှိ နေရာအနှံအပြားကို ဂျက်ဖိုက်တာ၊ Y-12 လေယာဥ် ၆ စီးကျော်နဲ့ ဗုံးအလုံးအရေ ၁၀၀ နီးပါးခန့် ကြဲချတိုက်ခိုက်ခဲ့တယ်လို့ သိရပါတယ်။

“အဲဒီနေ့ကဆိုရင်ညလုံးပေါက် ဗုံးကြဲချတိုက်ခိုက်ခဲ့တာပါ။ သူတို့ရဲ့ စစ်အင်အားတွေ ကျော်ဖြတ်လို့မရတဲ့ ဂုတ်ကြီးနဲ့ ပဇီကျေးရွာဖက်ကို အဓိကဗုံးကြဲချတိုက်ခဲ့တာ ဖြစ်ပါတယ်။ နတ်ရေကန်ကိုလာတဲ့ စစ်ကြောင်းက အတော်လေး အထိနာသွားပုံရပါတယ်။ အဲတာကြောင့် အခုလို တိုက်လေယာဥ် ၆ စီးကျော်နဲ့ ဗုံးကြဲချလာတာ ဖြစ်ပါတယ်။ နတ်ရေကန်ဗျူဟာကုန်းကို မကျအောင် သူတို့ကတော့ လေကြောင်း၊ ကုန်ကြောင်းမှ အသည်းအသန် ကာကွယ်နေတာတွေ ရှိပါတယ်” လို့ AA နဲ့ နီးစပ်တဲ့ စစ်ရေးသတင်းရင်းမြစ်တစ်ဦးက BBM ကို ပြောပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ်တွေဟာ မကွေးတိုင်းအထဲက ပဒါန်းတပ်နယ်မှာရှိတဲ့ ကပစ ၁၄ စက်ရုံကို ဦးတည်ကာ ထိုးစစ်ဆင်တိုက်ခိုက်လာနေတာဖြစ်ပြီး ရခိုင်နဲ့ မကွေးအစပ်အမ်း – ပဒါန်းလမ်းပိုင်းက နေရာအများအပြားကိုလည်း သိမ်းပိုက်ရရှိဖို့အတွက် ထိုးစစ်မပြတ်တိုက်ပွဲတွေ ဖော်ဆောင်နေတာလည်း ဖြစ်ပါတယ်။

မကွေးတိုင်းအစပ်က အမ်း – ပဒါန်းလမ်းပိုင်းကို အာရက္ခတပ်တော် AA နဲ့ ပူးပေါင်းမဟာမိတ်တပ်တွေက ၂၀၂၅ ခုနှစ်၊ ဇန်နဝါရီလအတွင်းမှာ ထိုးစစ်ဖော်ဆောင်ခဲ့တာဖြစ်ပြီး လပိုင်းလောက်အကြာမှာတော့ အဲဒီလမ်းပိုင်းက မထုံး၊ လင်းတဲ၊ စွန်တက် ၊ ဂုတ်စည်း ၊ ကံမြင့်ကန်၊ ဂုတ်ကြီး၊ ကြက်ရေစမ်း၊ ပိန်ရေစမ်း စတဲ့ကျေးရွာတွေကို ထိန်းချုပ်နိုင်ခဲ့တာလည်း ဖြစ်ပါတယ်။

ဒါ့အပြင် အမ်း – ပဒါန်းလမ်းပိုင်းရှိ အဓိကပင်မကုန်းစခန်းဖြစ်တဲ့ နတ်ရေကန်ဗျူဟာကုန်းကိုလည်း အာရက္ခတပ်တော် AA နဲ့ ပူးပေါင်းတပ်တွေက တစ်ပြိုင်နက်တည်း ထိုးစစ်ဆင်တိုက်ခိုက်ခဲ့တာဖြစ်ပြီး ဗျူဟာကုန်းနဲ့ ၁ မိုင်ကျော် အကွာလောက်က MPT တာဝါတိုင်စခန်းကုန်းကိုလည်း ပြီးခဲ့တဲ့ ၂၀၂၅ ခုနှစ်၊ သြဂုတ်လအတွင်းမှာ သိမ်းပိုက်ရရှိခဲ့တာလည်း ဖြစ်ပါတယ်။

နောက်ထပ် နတ်ရေကန်ဗျူဟာကုန်းရဲ့ ရှေ့ကာကင်းစခန်းတွေဖြစ်သလို ပဒါန်းတပ်နယ်အတွင်းကနေ အဲဒီဗျူဟာကုန်းကို စစ်ကူပို့ဆောင်ဖို့လွယ်ကူတဲ့ ဂုတ်ကြီး၊ ပဇီ (ခေါ်) ဖိုက်တာကုန်း၊ လိုင် စတဲ့ကာကင်းစခန်းတွေကိုပါ အာရက္ခတပ်တော် AA က ပြီးခဲ့တဲ့ ၂၀၂၅ ခုနှစ်၊ အောက်တိုဘာလအတွင်းမှာ ဖြတ်တောက်တိုက်ခိုက်ကာ သိမ်းပိုက်နိုင်ခဲ့တာလည်း ဖြစ်ပါတယ်။

နတ်ရေကန်ဗျူဟာကုန်းစခန်းဟာ စစ်ကောင်စီတပ်ရဲ့ လေကြောင်းရန် ကာကွယ်ရေးစခန်းတစ်ခုဖြစ်သလို အဲဒီစခန်းဟာ ရခိုင်ဒေသအပါအဝင် မြန်မာနိုင်ငံရဲ့ အနောက်ဖက်က လေကြောင်းရန်တွေကို ထောက်လှမ်းဖို့အတွက် ပြုလုပ်ထားတာကြောင့် အရေးပါတဲ့ စခန်းကုန်းတစ်ခုလည်း ဖြစ်ပါတယ်။

နတ်ရေကန်ဗျူဟာကုန်းစခန်းကို အမ်း – ပဒါန်းလမ်းပိုင်းက အမြင့်ပေ ၅၀၀၀ ကျော်မှာ တည်ဆောက်ထားတာဖြစ်ပြီး လက်ရှိအဲဒီဗျူဟာကုန်းမှာ ပြည်သူ့စစ်မှုထမ်း (ပစ) တွေအပါအဝင် စစ်ကောင်စီတပ်သား အင်အား ရာဂဏန်းလောက်သာ ကျန်ရှိတော့တယ်လို့လည်း သိရပါတယ်။

မကွေးတိုင်းအစပ် နတ်ရေကန်ဗျူဟာကုန်းကို အာရက္ခတပ်တော် AA ၊ ချင်းကာကွယ်ရေးတပ်နဲ့ အရှိုချင်းကာကွယ်ရေးတပ်၊ မကွေးတိုင်းအခြေစိုက် PDF တပ်ရင်းတွေ၊ ကျောင်းသားလက်ရုံး တပ်တော် (SAF)၊ ပြည်သူ့လွတ်လပ်ရေးတပ်တော် (PIA)၊ လူထုတော်လှန်ရေး မဟာမိတ်အင်အားစု PRA (မကွေး) တပ်တွေက ပူးပေါင်းကာ ထိုးစစ်ဆင်တိုက်ခိုက်နေတာလည်း ဖြစ်ပါတယ်။

Photos – ပုံဟောင်း

ချင်းပြည်မြောက်ပိုင်း၊ ဖလမ်းမြို့နယ်မှာ စစ်ကြောင်းထိုး ဝင်ရောက်လာတဲ့ စစ်ကောင်စီတပ်ဟာ ပြည်သူတွေ မွေးမြူတဲ့ အိမ်မွေးတိရစ္ဆာန်တွေကို ခိုးယူသတ်ဖြတ် စားသောက်နေကြတယ်လို့ ဒေသခံတွေက BBM ကို ပြောပါတယ်။

ဖလမ်းမြို့နယ်ကို စစ်ကြောင်းထိုးလာတဲ့ စစ်ကောင်စီတပ်ဟာ အရပ်သားပြည်သူတွေ နေထိုင်တဲ့ ကျေးရွာအနီးမှာ အခြေချ တပ်စွဲထားပြီး ၎င်းတို့ရိက္ခာအဖြစ် အိမ်မွေးတိရစ္ဆာန်တွေကို ခိုးယူသတ်ဖြတ်စားသောက်နေကြတာဖြစ်ပါတယ်။

“စစ်ကောင်စီတွေက ရိက္ခာတွေ ပြတ်နေတာ။ လေယာဥ်ကချပေးတာလည်း လက်နက်ခဲယမ်းတွေပါ။ ရိက္ခာတွေမပါတော့ အခုလို ပြည်သူတွေ မွေးမြူးထားတဲ့ တိရစ္ဆာန်တွေကို သတ်ဖြတ်စားသောက်နေကြတာပါ”လို့ ဖလမ်းမြို့နယ်ဒေသခံတစ်ဦးက BBM ကို ပြောပါတယ်။

ကလေးမြို့မှ ဖလမ်းမြို့သို့ စစ်ကြောင်းထိုးလာတဲ့ စစ်ကောင်စီစစ်ကြောင်းဟာ ဖလမ်းမြို့မြောက်ဘမ်းခြမ်း၊ ကလေး-ဖလမ်း လမ်းမနဲ့ ဖလမ်း-သိုင်းငင်း ကားလမ်းပေါ်ရှိ ကျေးရွာတွေမှာ ခြေကုတ်နေရာယူ တပ်စွဲထားတာဖြစ်ပါတယ်။

စစ်ကောင်စီတပ်က ရွာအနီးအနားမှာ တပ်စွဲထားတဲ့အတွက် ရွာသားတွေဟာ ရွာထဲမနေရဲတော့ဘဲ ဘေးလွတ်ရာ တောတောင်တွေမှာ တိမ်းရှောင်နေကြတာပါ။

“ရွာအနီးအနားမှာ စစ်ကောင်စီ တပ်စွဲထားတော့ အချိန်မရွေး တိုက်ပွဲတွေဖြစ်နိုင်သလို ဖမ်းဆီးလည်းခံရနိုင်တာကြောင့် ရွာသားတွေဟာ ရွာထဲမနေရဲတော့ဘဲ တောတောင်တွေထဲ ထွက်ပြေးနေကြတာပါ။ အဲဒီလို ထွက်ပြေးတဲ့ခါမှာ အိမ်မွေးတိရစ္ဆာန်တွေကို ပစ်ထားခဲ့ရတယ်။ ပိုင်ရှင်တွေမရှိတော့ စစ်ကောင်စီက သူတို့ စိတ်ကြိုက် ဖမ်းဆီးသတ်ဖြတ် စားသောက်နေကြတာပါ”လို့ ဖလမ်းမြို့နယ်ဒေသခံတစ်ဦးက BBM ကို ပြောပါတယ်။

စစ်ကောင်စီက လေကြောင်းမှ လက်နက်ခဲယမ်းတွေကို ချပေးပေမဲ့ ရိက္ခာတွေ ပြည့်ပြည့်စုံစုံ မချပေးတဲ့အတွက် ဖလမ်းမြို့နယ်ကို စစ်ကြောင်းထိုးတဲ့ စစ်ကောင်စီတပ်ဟာ အိမ်မွေးတိရစ္ဆာန်တွေအပြင် အိမ်ထဲရှိ စားစရာတွေကိုလည်း ခိုးယူစားသောက်နေကြပါတယ်။

လက်ရှိ ဖလမ်းမြို့နယ်အတွင်းမျာ စစ်ကောင်စီနဲ့ ဒေသကာကွယ်ရေးတပ်ဖွဲ့တွေကြား စစ်ရေးတင်းမာမှုတွေ ဆက်လက်ရှိနေပြီး လေကြောင်းအန္တရာယ်နဲ့ စစ်ကြောင်းထိုးလာမှုကြောင့် ပြည်သူတွေ နေရပ်မပြန်နိုင်ကြသေးပါဘူးလို့ သိရပါတယ်။⁩

စစ်ခေါင်းဆောင် ရဲဝင်းဦး လက်ထက်မှာ ရခိုင်ပြည်၊ သံတွဲမြို့ကို ဗုံးကြဲချတိုက်ခိုက်မှုကြောင့် ကလေးငယ် ၂ ဦး အပါအဝင် အပြစ်မဲ့အရပ်သား ၄ ဦးပါတဲ့ မိသားစုတစ်စုလုံး သေဆုံးခဲ့ရပြီး ၃ ဦးမှာ ထိခိုက်ဒဏ်ရာရရှိသွားတယ်လို့ အာရက္ခတပ်တော် AA က မနေ့က ဧပြီလ ၁ ရက်နေ့မှာ သတင်းထုတ်ပြန်ထားပါတယ်။

မနေ့က ဧပြီလ (၁) ရက်နေ့၊ နေ့လယ် (၁၁) နာရီ (၁၁) မိနစ်ကနေ (၁၁) နာရီ (၄၅) မိနစ်အချိန်ထိ စစ်ကောင်စီတပ်ဟာ ရခိုင်ပြည်၊ သံတွဲမြို့နယ်ကို ဂျက်ဖိုက်တာ (၄) စီးနဲ့ လေကြောင်းကနေ ပြင်းပြင်းထန်ထန် ဗုံးကြဲချတိုက်ခိုက်မှု ပြုလုပ်ခဲ့တာလည်း ဖြစ်ပါတယ်။

အဆိုပါ စစ်ကောင်စီတပ်ရဲ့ ဗုံးကြဲချတိုက်ခိုက်မှုဟာ သံတွဲမြို့နယ်ရှိ အရင်က သူတို့ တပ်စခန်းချ နေထိုင်ခဲ့ကြတဲ့ ခလရ (၅၅) စခန်းဟောင်း အနီးဝန်းကျင်ကို ကျရောက်ပေါက်ကွဲခဲ့တာဖြစ်ပြီး အဲဒီအနီးအနားဝန်းကျင်နေရာမှာ စစ်ရှောင်နေကြတဲ့ ကလေးငယ် (၂) ဦးအပါအဝင် (၄) ဦးပါတဲ့ အပြစ်မဲ့အရပ်သား မိသားစု တစ်စုလုံးမှာ ပွဲချင်းပြီးသေဆုံးခဲ့ရသလို နောက်ထပ်ကလေး (၂) ဦးနဲ့ ကိုယ်ဝန်ဆောင် အမျိုးသမီး (၁) ဦးတို့မှာလည်း ထိခိုက်ဒဏ်ရာတွေ ရရှိခဲ့တာလည်း ဖြစ်ပါတယ်။

စစ်ကောင်စီတပ်ရဲ့ ဗုံးကြဲချတိုက်ခိုက်မှုကြောင့် သေဆုံးသွားတဲ့သူတွေမှာ ကျောက်တော်မြို့နယ်၊ တူးမြောင်းကျေးရွာက မအေးငြိမ်းလှိုင် (၂) နှစ်၊ မပြည့်ဖြိုးနွယ် (၇) နှစ်၊ ဒေါ်မအောင်သန်း (၂၆) နှစ်၊ ဒေါ်မအေးမေ (၄၇) နှစ်တို့ ဖြစ်ကြပါတယ်။

ထိခိုက်ဒဏ်ရာ ရရှိသွားကြတဲ့သူတွေမှာတော့ သံတွဲမြို့နယ်၊ ကျိန္တလီမြို့၊ အမှတ် ၂ ရပ်ကွက်က ကိုယ်ဝန်ဆောင်အမျိုးသမီး ဒေါ်အေးသန္တာဦး ၂၈ နှစ်၊ မမိုးထက်သန္တာ ၈ နှစ်၊ သံတွဲမြို့နယ်၊ ကင်းမော်ကျေးရွာက မသဲရတီဦး ၃ နှစ်တို့ ဖြစ်ပါတယ်။

စစ်ကောင်စီတပ်ဟာ သံတွဲမြို့နယ်ကို မနေ့က ဗုံးကြဲချတိုက်ခိုက်ခဲ့တဲ့အပြင် ပင်လယ်ပြင်မှာ တပ်စွဲထားတဲ့ စစ်သင်္ဘောတစ်စီးကလည်း လက်နက်ကြီးအချို့ကိုပါ တစ်ချိန်တည်း ပစ်ခတ်တိုက်ခိုက်ခဲ့တယ်လို့ AA ရဲ့ ထုတ်ပြန်ချက်မှာ ဖော်ပြထားပါတယ်။

အခုလို စစ်ကောင်စီတပ်က လေကြောင်းတိုက်ခိုက်မှုကြောင့် ပြည်သူတွေအနေနဲ့လည်း လေကြောင်းရန်ကို အထူးသတိရှိကြဖို့ AA က တိုက်တွန်းထားပါတယ်။

ပြီးခဲ့တဲ့ ဒီဇင်ဘာလ ၂၉ ရက်နေ့၊ ညနေ ၈ နာရီအချိန်မှာလည်း စစ်ကောင်စီတပ်ဟာ သံတွဲမြို့နယ်၊ ငပလီမြို့၊ လင်းသာရပ်ကွက်၊ ကျင်းကန်ကြီးကျေးရွာကို လေကြောင်းကနေ ဂျက်ဖိုက်တာနဲ့ ပေါင် ၅၀၀ ဗုံး ၂ လုံး ကြဲချတိုက်ခိုက်ခဲ့တာကြောင့် ကလေးငယ် ၁ ဦးအပါအဝင် အရပ်သားပြည်သူ ၉ ဦး သေဆုံးခဲ့ရပြီး ၁၄ ဦးမှာ ထိခိုက်ဒဏ်ရာ ရရှိခဲ့တာလည်း ဖြစ်ပါတယ်။

ရခိုင်ပြည်၊ သံတွဲမြို့နယ်ကို အာရက္ခတပ်တော် AA က ၂၀၂၄ ခုနှစ်၊ စက်တင်ဘာလ (၅) ရက်နေ့မှာ အပြီးသတ်သိမ်းပိုက်နိုင်ခဲ့တာလည်း ဖြစ်ပါတယ်။

MNDAAနဲ့ TNLAတို့ကြား အချိန်အတော်ကြာစစ်ရေးတင်းမာနေရာက တိုက်ပွဲတွေစတင်ဖြစ်ပွါးနေပြီး ကွက်ခိုင်မြို့အပါ နောက်ထပ်စစ်မျက်နှာ (၄)ခုမှာ ဒရုန်းတွေအသုံးပြုပြီးတိုက်ခိုက်နေတယ်လို့ ဒေသခံသတင်းရင်းမြစ်တွေထံမှ သိရပါတယ်။

ပြီးခဲ့တဲ့ဖေဖော်ဝါရီလ ၁၃ ရက်နေ့ က ကွက်ခိုင်မြို့ပေါ်ရှိ MNDAA တပ်ဆင်ထားတဲ့ CCTV တွေကို TNLA ဘက်က လိုက်လံဖြုတ်သိမ်းတာနဲ့ မြို့ပေါ်က MNDAA တပ်ဖွဲ့တွေကို အင်အားသုံးဖယ်ရှားရာမှ MNDAAနဲ့ TNLA တို့ စတင်စစ်ရေးတင်းမာလာခြင်းပဲ ဖြစ်ပါတယ်။

MNDAA ဘက်က ဒီဖြစ်စဥ်ဖြစ်ပြီးနောက် သိန္ဒီမြို့နယ်၊ လားရှိုးမြို့နယ်တို့ရှိTNLA တပ်ဖွဲ့ဝင်တွေကို ဖမ်းဆီးရိုက်နှက်တာတွေ TNLA ထိန်းချုပ်ရာဒေသတွေကို ကုန်ပစ္စည်းတင်သွင်းခွင့်ပိတ်ပင်တာတွေပြုလုပ်ခဲ့ပြီး နှစ်ဖက်စလုံးကလည်း စစ်အင်အားတိုးချဲ့တာတွေပြုလုပ်ခဲ့ကြပါတယ်။

ဒီလိုစစ်ရေးတင်းမာမှုတွေဖြစ်ပေါ်နေတဲ့ TNLA နဲ့ MNDAA တို့ကြား ပစ်ခတ်မှုတွေ ဒီနေ့မနက်ပိုင်းမှာစတင်ဖြစ်ပွါးလာပြီး တိုက်ပွဲတွေအတွင်း ဒရုန်းအသုံးပြုတိုက်ခိုက်နေတယ်လို့ ဒေသခံစစ်ရေးသတင်းရင်းမြစ်တစ်ဦးက BBM ကိုပြောပါတယ်။

“MNDAAနဲ့ TNLAတို့စစ်ရေးတင်းမာရာကနေ ကျည်စဖောက်ပြီ၊MNDAAဘက်က ကျည်စဖောက်တာလို့လည်း သိထားတယ်၊ ဒရုန်းတွေနဲ့ပါဆော်နေတာ”

ဒါ့အပြင် လက်ရှိတိုက်ပွဲတွေစတင်ဖြစ်ပွါးနေတဲ့နေရာတွေဟာ တင်းမာမှုတွေစတင်ရာ ကွက်ခိုင်မြို့နယ်ဘက်သာမက မန်ပိန်း၊ နမ့်သောင်း၊ ကာလျန်ဘက်တွေမှာပါ ဖြစ်ပွါးနေတယ်လို့ အဆိုပါသတင်းရင်းမြစ်ကဆက်ပြောပါတယ်။

“ခုက ကွက်ခိုင်၊ မန်ပိန်း၊ နမ့်သောင်း၊ ကာလျန် ဘက်တွေမှာ ဖြစ်နေတာပါ၊ စစ်မျက်နှာလေးခုလောက်ကို ဖွင့်ပြီးဖြစ်နေကြတာ”

အဆိုပါဒေသတွေမှ ပြည်သူတွေအနေနဲ့ လက်နက်ပေါက်ကွဲသံတွေကို လက်ရှိအချိန်ထိ ကြားနေရပြီး တိုက်ပွဲကြောင့် စစ်ရှောင်ရမှာတွေ ကုန်ပစ္စည်းစျေးနှုန်းတက်မှာတွေကို စိုးရိမ်နေတယ်လို့လည်း သိရပါတယ်။

MNDAAနဲ့ TNLAတို့ရဲ့ အဆိုပါတိုက်ပွဲတွေနဲ့ပတ်သတ်ပြီး ဘုံရန်သူစစ်ကောင်စီကို မတိုက်ဘဲမဟာမိတ်အချင်းချင်းအခုလိုတိုက်ပွဲဖော်ဆောင် တာဟာ မဖြစ်သင့်ဘူးဟုလည်း ဒေသခံတွေအပါတော်လှန်ရေးအင်အားစုတွေဘက်က ပြောဆိုမှုတွေရှိနေပါတယ်။