ပြည်တွင်းသတင်း

🟥 စစ်အုပ်စုနဲ့ မပတ်သက်ဖို့ ထိုင်းအစိုးရကို JFM တိုက်တွန်း

BBM – ဩဂုတ် ၄
သတင်း – မင်း

ကိုယ်တိုင်တင်သမ္မတ မင်းအောင်လှိုင်ဟာ လက်ရှိ ထိုင်း၀န်ကြီးချုပ် အနုတင် ချန်ဝီရာကူးရဲ့ တရား၀င်ဖိတ်ကြားချက်အရ ထိုင်းနိုင်ငံကို သွားရောက်မှာဖြစ်ကြောင်း စစ်တပ်လက်အောက်ခံ မီဒီယာတွေက ဩဂုတ်လ ၃ရက်နေ့ ရက်စွဲနဲ့ ထုတ်ပြန်လာပါတယ်။

အဆိုပါ ထုတ်ပြန်ချက်ထဲမှာ ဘယ်နေ့မှာသွားရောက်တွေ့ဆုံမယ်ဆိုတာကို မဖော်ပြထားပေမဲ့ နိုင်ငံတကာသတင်းဌာနတွေရဲ့ဖော်ပြချက်အရ ဩဂုတ်လဆန်းပိုင်းမှာ လာရောက်မယ်လို့ သိရပါတယ်။

အဆိုပါ ခရီးစဉ်အတွင်း မင်းအောင်လှိုင်ဟာ အနုတင်နဲ့ တွေ့ဆုံပြီး နှစ်နိုင်ငံ ဆွေးနွေးပွဲပြုလုပ်တာ၊ ထိုင်းနိုင်ငံအမျိုးသားလွှတ်တော်ယာယီဥက္ကဋ္ဌနဲ့ တွေ့ဆုံတာတွေကို ပြုလုပ်သွားမယ်လို့ စစ်ကောင်စီရဲ့ ထုတ်ပြန်ချက်အရ သိရပါတယ်။

ဒါ့အပြင် မင်းအောင်လှိုင်ဟာ စီးပွားရေးအဖွဲ့အစည်းတွေမှ ပုဂ္ဂိုလ်တွေကို လက်ခံတွေ့ဆုံမှာဖြစ်ပြီး စီးပွားရေးဖိုရမ်ကိုလည်းတက်ရောက်သွားမယ်လို့ ဆိုပါတယ်။

အဆိုပါ ခရီးစဉ်မှာ မင်းအောင်လှိုင်နဲ့အတူ အတုအယောင်ရွေးကောက်ပွဲက တင်မြောက်ထားတဲ့ ပြည်ထောင်စုဝန်ကြီးတွေနဲ့ စစ်ကောင်စီ တာဝန်ရှိပုဂ္ဂိုလ်တွေ လိုက်ပါသွားမှာ ဖြစ်ကြောင်း သိရပါတယ်။

အဆိုပါ ခရီးစဉ်မတိုင်မီ ရက်ပိုင်းအလို မနေ့က ဩဂုတ်လ ၃ရက်နေ့မှာပဲ နိုင်ငံတော် အတိုင်ပင်ခံ ပုဂ္ဂိုလ်‌ ဒေါ်အောင်ဆန်းစုကြည်နဲ့ အပြည်ပြည်ဆိုင်ရာ ကြက်ခြေနီအသင်းမှ ကိုယ်စားလှယ်တို့တွေ့ဆုံခဲ့ကြောင်း သိရပါတယ်။

ဒါဟာ ဇူလိုင်လ ၃၁ရက်နေ့ မနက်ပိုင်းက ကိုယ်တိုင်တင် သမ္မတအဖြစ် ရက်၁၀၀ပြည့်တဲ့နေ့မှာ အာဆီယံအသင်းရဲ့ ခွဲခြားဆက်ဆံမှုကို မနှစ်မြို့ကြောင်းပြောခဲ့တဲ့အပြင် ပြန်လည်တံ့ပြန်ဖို့လည်း စီစဉ်နေကြောင်း မိန့်ခွန်းမှာထည့်ပြောအပြီး ၃ရက်အကြာမှာပဲ ဒေါ်အောင်ဆန်းစုကြည်နဲ့ ICRCက ကိုယ်စားလှယ်တို့ကို တွေ့ခွင့်ပေးခဲ့တာပါ။

အခုလို မင်းအောင်လှိုင်နဲ့ ထိုင်း၀န်ကြိးချုပ်တို့ တွေ့ဆုံမယ့် ခရီးစဉ်ကို Justice for Myanmar(JFM)က မင်းအောင်လှိုင်ကို လက်ခံမတွေ့ဆုံဖို့ ထိုင်းအစိုးရကို တောင်းဆိုထားပါတယ်။

မင်းအောင်လှိုင်ဟာ အမေရိကန်၊ ယူကေ၊ ဥရောပသမဂ္ဂ၊ ကနေဒါနဲ့ ဩစတြေးလျတို့ရဲ့ ဒဏ်ခတ်ပိတ်ဆို့မှု ခံထားရသူပါ။

အခုလို နိုင်ငံတကာရာဇ၀တ်သားနဲ့ တွေ့ဆုဲမယ့် ထိုင်းကုမ္ပဏီတွေကို စစ်ကောင်စီရဲ့ ရာဇဝတ်မှုတွေမှာ ကြံရာပါ ဖြစ်လာစေနိုင်တာကြောင့် စစ်အုပ်စုဆီ စီးဆင်းနေတဲ့ ငွေကြေး၊ လက်နက်နဲ့ လေယာဉ်ဆီ လမ်းကြောင်းအားလုံးကို ထိုင်းအစိုးရဘက်က ဖြတ်တောက်ပေးဖို့ JFM က တောင်းဆိုထားပါတယ်။

ဒါ့အပြင် ထိုင်းအစိုးရအနေနဲ့ မြန်မာပြည်သူတွေရဲ့ သွေးနဲ့ စွန်းထင်းနေတဲ့ စစ်ရာဇဝတ်ကောင်ကို ကော်ဇောနီခင်း ကြိုဆိုမယ့်အစား စစ်ကောင်စီရဲ့ တရားမဝင် ပိုင်ဆိုင်မှုတွေကို သိမ်းဆည်းပြီး အနာဂတ် ဖက်ဒရယ် ဒီမိုကရေစီအတွက် ရုန်းကန်နေတဲ့ မြန်မာပြည်သူတွေဘက်က ခိုင်မာစွာ ရပ်တည်ပေးဖို့လည်း JFM ပြောရေးဆိုခွင့်ရှိသူ မရတနာမောင်က ‌တောင်း‌ဆိုထားပါတယ်။

စစ်ကော်မရှင်ရဲ့ ထုတ်ပြန်ကြေငြာချက်အရ တာဝန်ကနေ အနားပေးခံထားရတဲ့ စစ်ကော်မရှင်ပြောခွင့်ရ၊ ပြည်သူ့ဆက်ဆံရေးနှင့် စိတ်ဓါတ်စစ်ဆင်ရေးညွှန်ကြားရေးမှူး ဗိုလ်ချုပ်ဇော်မင်းထွန်းကို စစ်ခေါင်းဆောင်တွေအနေနဲ့ အရေးယူမှာမဟုတ်ကြောင်း တပ်တွင်းသတင်းရင်းမြစ်တွေထံကနေသိရပါတယ်။

ဗိုလ်ချုပ်ဇော်မင်းထွန်းအနေနဲ့ စစ်ခေါင်းဆောင်ရဲ့ ကျန်းမာရေးအခြေအနေကို မလိုအပ်ဘဲ ထုတ်ပြန်ခဲ့တာကြောင့် ပြီးခဲ့တဲ့ မတ်လ ၂၅ ရက်နေ့ကတည်းက ပြည်သူ့ဆက်ဆံရေးနဲ့ စိတ်ဓာတ်စစ်ဆင်ရေးညွှန်ကြားရေးမှူးရာထူးကနေ အနားပေးခဲ့တယ်လို့ သတင်းတွေထွက်ပေါ်ခဲ့ပါတယ်။

စစ်အာဏာသိမ်းမှုကာလမတိုင်မီ NLD အစိုးရလက်ထက်ကတည်းက စစ်တပ်ရဲ့ သတင်းမှန်ပြန်ကြားရေးအဖွဲ့နဲ့အတူ လူသိများလာတဲ့ ဗိုလ်ချုပ် ဇော်မင်းထွန်းဟာ စစ်အာဏာသိမ်းပြီးနောက်ပိုင်းမှာလည်း စစ်ခေါင်းဆောင် မင်းအောင်လှိုင် အလိုကျ သတင်းလိမ်တွေကို ထုတ်ပြန်ပေးခဲ့သူဖြစ်တာကြောင့် မင်းအောင်လှိုင်နည်းတူ ပြည်တွင်းကော ပြည်ပမှာပါ လူမုန်းများတဲ့ စစ်ဗိုလ်ချုပ်တစ်ယောက်ဖြစ်ပါတယ်။

တပ်တွင်းကရတဲ့ သတင်းအချက်အလက်တွေအရ ဗိုလ်ချုပ်ဇော်မင်းထွန်းကို စစ်ခေါင်းဆောင်ရဲ့ ကျန်းမာရေးနဲ့ပတ်သတ်ပြီး သတင်းထုတ်ပြန်ခဲ့တာကြောင့် မင်အောင်လှိုင်ကခေါ်ယူ ဆူပူငေါက်ငမ်းခဲ့တဲ့အပြင် နောက်ထပ် ဒုတိယဗိုလ်ချုပ်ကြီး အဆင့်ရှိသူတစ်ဦးကလည်း အဂတိ အမှုကိစ္စတစ်ခုနဲ့ပတ်သက်ပြီး ဇော်မင်းထွန်းကို ခေါ်ယူမေးမြန်းခဲ့တယ်လို့ သိရပါတယ်။

အခုနောက်ဆုံးသိရတဲ့ တပ်တွင်းသတင်းရင်းမြစ်တွေရဲ့သတင်းအရ ဗိုလ်ချုပ်ဇော်မင်းထွန်းကို မင်းအောင်လှိုင်အနေနဲ့ ဆက်လက်အရေးယူဖို့မရှိပေမဲ့ အခြားစစ်ဗိုလ်ချုပ်များနည်းတူ ၎င်းအစိုးရလက်ထက်မှာ တာဝန်ဆက်ပေး မပေးကိုတော့ အတိအကျသိရှိရခြင်း မရှိသေးဘူးလို့သိရပါတယ်။

မကွေးတိုင်း၊ မြိုင်နဲ့ ပေါက်မြို့နယ်အတွင်းရှိ ရေနံမြေ၊ ရေနံလုပ်ငန်းတွေနဲ့ ပတ်သက်တဲ့ စီမံခန့်ခွဲမှုဆိုင်ရာကိစ္စရပ်တွေကို အမျိုးသားညီညွတ်ရေးအစိုးရ NUG နဲ့ မကွေးဖက်ဒရယ်ယူနစ်ကြားကာလအစိုးရ တာဝန်ရှိသူတွေက ပူးတွဲပြီး ကြီးကြပ်ဆောင်ရွက်သွားမယ်လို့ သိရပါတယ်။

မနေ့က ဧပြီလ ၃ ရက်နေ့မှာ မြိုင်နဲ့ ပေါက်မြို့နယ်အတွင်းရှိ စီမံခန့်ခွဲမှုဆိုင်ရာ ကိစ္စရပ်တွေနဲ့ ပတ်သက်ပြီး အမျိုးသားညီညွတ်ရေးအစိုးရ တာဝန်ရှိသူတွေနဲ့ မကွေးဖက်ဒရယ်ယူနစ်ကြားကာလအစိုးရ တာဝန်ရှိသူတို့က Online မှတဆင့် ထပ်မံတွေ့ဆုံဆွေးနွေးခဲ့ကြတာ ဖြစ်ပါတယ်။

တွေ့ဆုံဆွေးနွေးမှုကနေ လတ်တလော မြိုင်မြို့နယ်နဲ့ ပေါက်မြို့နယ်တွေမှာ ဖြစ်ပေါ်နေတဲ့ ရေနံမှော်ကိစ္စ အခြေအနေတွေကို ဖြေရှင်းနိုင်မယ့် သဘောတူညီမှုတွေ ရရှိခဲ့တယ်လို့ အမျိုးသားညီညွတ်ရေးအစိုးရ NUG က ယမန့်နေ့ ညပိုင်းမှာ အသိပေးထုတ်ပြန်ခဲ့တာပါ။

အဆိုပါ အစည်းအဝေးမှာ အမျိုးသားညီညွတ်ရေးအစိုးရ ပြည်ထောင်စုဝန်ကြီးချုပ်ရုံး ပြည်ထောင်စုဝန်ကြီး ဒေါက်တာ ဇော်ဝေစိုး၊ လျှစ်စစ်နှင့်စွမ်းအင်ဝန်ကြီးဌာန ပြည်ထောင်စုဝန်ကြီး ဦးစိုးသူရထွန်း ဦးဆောင်တဲ့ တာဝန်ရှိသူများ၊ မကွေးဖက်ဒရယ်ယူနစ်ကြားကာလအစိုးရ ဝန်ကြီးချုပ်၊ ဒုဝန်ကြီးချုပ်နဲ့ မကွေးဖက်ဒရယ်ယူနစ်လွှတ်တော်မှ ကိုယ်စားလှယ်တဦးတို့ ဦးဆောင်တဲ့ တာဝန်ရှိသူတွေ ပူးတွဲ၍ မကွေးဖက်ဒရယ်ယူနစ် ရေနံနှင့် ရေနံထွက်ပစ္စည်းများဆိုင်ရာ ကြီးကြပ်ရေးအဖွဲ့ကို ဖွဲ့စည်းသွားမယ်လို့ အသိပေးထားပါတယ်။

အမျိုးသားညီညွတ်ရေးအစိုးရ NUG နဲ့ မကွေးဖက်ဒရယ်ယူနစ်ကြားကာလအစိုးရ ဝန်ကြီးတွေ ဦးဆောင်တွေ တာဝန်ရှိသူတွေနဲ့ ဖွဲ့စည်းမယ့် ကြီးကြပ်ရေးအဖွဲ့က ရေနံမြေ၊ ရေနံလုပ်ငန်းတွေနဲ့ ပတ်သက်တဲ့ စီမံခန့်ခွဲမှုဆိုင်ရာ ကိစ္စရပ်တွေကို ကြီးကြပ်ဆောင်ရွက်သွားကြဖို့ အတည်ပြုဆုံးဖြတ်ခဲ့ကြတယ်လို့ ထုတ်ပြန်ချက်မှာ ဖော်ပြထားပါတယ်။

ဒါ့အပြင် မကွေးဖက်ဒရယ်ယူနစ်အတွင်းရှိ ကာကွယ်ရေးအဖွဲ့အစည်းများ ကွပ်ကဲမှု စနစ်တကျ ဖြစ်စေရေး၊ အမှုအခင်းများ ဖြေရှင်းဆောင်ရွက်ရေး၊ လုံခြုံရေးနှင့် တရားဥပဒေစိုးမိုးရေးဆိုင်ရာ ကိစ္စရပ်များကိုလည်း မကွေးဖက်ဒရယ်ယူနစ် ကြားကာလအစီအမံဆိုင်ရာဥပဒေနဲ့အညီ ကောင်းစွာပူးပေါင်းဆောင်ရွက်သွားကြဖို့ ဆွေးနွေးဆုံးဖြတ်ခဲ့ကြတယ်လို့ သိရပါတယ်။

Photo – Social Media (ပုံဟောင်း)

စစ်အုပ်စုအများစုပါဝင်တဲ့ လွှတ်တော်နှစ်ရပ်နဲ့ စစ်တပ်ကိုယ်စားလှယ် အစုအဖွဲ့တွေက သမ္မတဖြစ်လာမဲ့ ဒုတိယသမ္မတ ၃ ဦး ရွေးချယ်လျက်ရှိရာ စစ်ခေါင်းဆောင် မင်းအောင်လှိုင်နဲ့ ဒေါ်နန်းနီနီအေး တို့ကို အတည်ပြု ရွေးချယ်လိုက်တယ်လို့ သိရပါတယ်။

ဒီကနေ့ မတ်လ ၃၁ ရက်မှာ ဒုသမ္မတရွေးချယ်ရေးအစုအဖွဲ့ အစည်းအဝေးတွေကို ဆက်လက်ပြုလုပ်နေပြီး ပြည်သူ့လွှတ်တော်အစုအဖွဲ့က မင်းအောင်လှိုင် ကို အတည်ပြုရွေးချယ်ခဲ့တဲ့အပြင် အမျိုးသားလွှတ်တော်အစုအဖွဲ့က ဒေါ်နန်းနီနီအေးကို ရွေးချယ်ခဲ့တယ်လို့ စစ်ကောင်စီ လက်အောက်ခံမီဒီယာတွေမှာ ဖော်ပြလာတာပါ။

ပြည်သူ့လွှတ်တော်အစုအဖွဲ့က စစ်ခေါင်းဆောင် မင်းအောင်လှိုင်နဲ့ တောင်တွင်းကြီး မဲဆန္ဒနယ်မှ ဒေါက်တာ ကျော်ဆွေ တို့ကို ဆက်လက်ရွေးချယ်ကြရာ မင်းအောင်လှိုင်က ၂၄၇ မဲ၊ ဒေါက်တာ ကျော်ဆွေက ၁၀ မဲ ရရှိခဲ့တဲ့အတွက် မင်းအောင်လှိုင်ကို ဒုတိယသမ္မတအဖြစ် အတည်ပြုရွေးချယ်ခဲ့တယ်လို့ သိရပါတယ်။

အမျိုးသားလွှတ်တော်းအစုအဖွဲ့က ကရင်ပြည်နယ် ကြံ့ခိုင်ရေးပါတီ ဥက္ကဋ္ဌ ဒေါ်နန်းနီနီအေးနဲ့ တိုင်းရင်းသားပါတီ၊ ကချင်ပြည်နယ် မဲဆမ္ဒနယ် ၂ က ဒေါက်တာ မနမ်တူးဂျာတို့ကို ရွေးချယ်ရာ ဒေါ်နန်းနီနီအေးကို ဒုသမ္မတအဖြစ် ရွေးချယ်ခဲ့တယ်လို့ သိရပါတယ်။

ပြည်သူ့လွှတ်တော်အစုအဖွဲ့၊ အမျိုးသားလွှတ်တော်အစုအဖွဲ့နဲ့ ၂၅ ရာခိုင်နှုန်းနေရာယူထားတဲ့ စစ်တပ်အစုအဖွဲ့တို့က ဒုတိယသမ္မတ ၃ ဦး အတည်ပြုရွေးချယ်ရမှာ ဖြစ်ပြီး စစ်တပ်အစုအဖွဲ့က ရွေးချယ်သူကို မသိရသေးသလို အဆိုပါဒုသမ္မတ ၃ ဦးထဲမှ ၁ ဦးက သမ္မတဖြစ်လာမှာဖြစ်ပြီး ကျန် ၂ ဦးကတော့ ဒုသမ္မတ (၁)နဲ့ (၂) ဖြစ်လာမှာပဲ ဖြစ်ပါတယ်။

စစ်ဗိုလ်ချုပ်တွေ ကြီးစိုးထားတဲ့ လွှတ်တော်နှစ်ရပ်နဲ့ စစ်တပ်ကိုယ်စားလှယ် အစုအဖွဲ့တွေက ဒုသမ္မတ ရွေးချယ်ရေးအစည်းအဝေးများ ပြုလုပ်လျက်ရှိရာ မင်းအောင်လှိုင်ကို ပြည်သူ့လွှတ်တော်အစုအဖွဲ့က ဒုသမ္မတအဖြစ် ရွေးချယ်လိုက်တယ်လို့ သိရပါတယ်။

ဒီကနေ့ မတ်လ ၃၀ ရက်မှာ ပြည်သူ့လွှတ်တော်အစုအဖွဲ့၊ အမျိုးသားလွှတ်တော်အစုအဖွဲ့နဲ့ ၂၅ ရာခိုင်နှုန်းနေရာယူထားတဲ့ စစ်တပ်အစုအဖွဲ့တို့က ဒုတိယသမ္မတများ ရွေးချယ်ရေးအတွက် အစည်းအဝေးတွေ ပြုလုပ်နေတာဖြစ်ပါတယ်။

ပြည်သူ့လွှတ်တော်အစုအဖွဲ့ကစစ်ခေါင်းဆောင် မင်းအောင်လှိုင်ကို ဒုတိယသမ္မတအဖြစ် တင်သွင်းလိုက်သလို တိုင်းရင်းသားစည်းလုံးညီညွတ်ရေးပါတီရဲ့ တောင်တွင်းကြီးမဲဆန္ဒနယ်မှ ဒေါက်တာ ကျော်ဆွေ ကိုလည်း ရွေးချယ်တင်သွင်းလိုက်တယ်လို့ ဆိုပါတယ်။

“ဒုသမ္မတ ရွေးလိုက်ပြီ ဆိုကတည်းက ဒီကောင်(မင်းအောင်လှိုင်)က သမ္မတလုပ်မှာ လုံးဝသေချာပါပြီ၊ အစိပ်သား(စစ်တပ်ကိုယ်စားလှယ်အစုအဖွဲ့)က ‌ရွေးမယ်လို့ အများစုထင်ပေမဲ့ ပြည်သူ့လွှတ်တော်က ရွေးလိုက်တယ်၊ ဒါကဘာလဲဆိုရင် အစိပ်သားထက် ပြည်သူ့လွှတ်တော်က ရွေးတဲ့ သမ္မတလောင်းက ပိုခိုင်မာတာကြောင့်လဲ ဖြစ်နိုင်ပါတယ်” လို့ CDM ဗိုလ်ကြီး တဦးက သုံးသပ်ပြောပါတယ်။

အလားတူ အမျိုးသားလွှတ်တော်အစုအဖွဲ့ ကလည်း ဒုတိယသမ္မတအဖြစ် ကရင်ပြည်နယ် ကြံ့ခိုင်ရေးပါတီ ဥက္ကဋ္ဌ နန့်နီနီအေးနဲ့ တိုင်းရင်းသားပါတီအစုအဖွဲ့က ဒေါက်တာ မနမ်တူးဂျာတို့ကို ရွေးချယ်တင်သွင်းလိုက်တယ်လို့ သိရပါတယ်။

အဆိုပါအစုအဖွဲ့ ၃ ဖွဲ့က အမည်စာရင်းရွေးချယ်ခဲ့တဲ့ ဒုသမ္မတ ၃ ဦးထဲက ၁ ဦးကို သမ္မတအဖြစ် ထပ်မံရွေးချယ်မှာဖြစ်ပြီး ကျန် ၂ ဦးကတော့ ဒုသမ္မတ (၁)နဲ့ (၂) ဖြစ်လာမှာပဲ ဖြစ်ပါတယ်။

ဒုသမ္မတ အဖြစ် ရွေးချယ်ခံရတဲ့ မင်းအောင်လှိုင်က တရက်တည်းမှာ ဗိုလ်ချုပ်ကြီး ရဲဝင်းဦးကို တပ်ချုပ်၊ ဗိုလ်ချုပ်ကြီး ကျော်စွာလင်းကို ဒုတပ်ချုပ်အဖြစ် တပ်ခေါင်းဆောင်ပိုင်းတွေကိုလည်း အသီးသီးပြောင်းလဲခဲ့တာလည်း ဖြစ်ပါတယ်။