ပြည်တွင်းသတင်း

မကွေးတိုင်း၊ ရေစကြိုမြို့နယ်အတွင်းမှာရှိတဲ့ စတားလင့် အင်တာနက်ဆိုင်ကို စစ်ကောင်စီက လေကြောင်းဗုံးကြဲမှုတွေပြုလုပ်ခဲ့တာကြောင့် ကလေးငယ်တွေအပါ ပြည်သူ(၁၂)ယောက် သေဆုံးခဲ့တယ်လို့ အမျိုးသားညီညွှတ်ရေးအစိုးရ(NUG)မှ ထုတ်ပြန်ထားပါတယ်။

ပြီးခဲ့တဲ့ အောက်တိုဘာလ ၁၆ ရက်နေ့ ညနေ ၄ နာရီအကျော်မှာ မကွေးဖက်ဒရယ်ယူနစ်လက်အောက်ရှိ၊ ရေစကြိုမြို့နယ်၊ သစ်ခေါက်ဆိပ်ရွာနဲ့ သစ်ကြီးတောရွာမှာရှိတဲ့ စတားလင့်အင်တာနက်ဆိုင်တွေကို တိုက်ခိုက်ခဲ့ခြင်းဖြစ်တယ်လို့ သိရပါတယ်။

အဆိုပါ စတားလင့်အင်တာနက်ဆိုင်တွေဟာ ပြည်သူတွေ သတင်းအချက်အလက်ယူရာ ဆိုင်တွေဖြစ်ပြီး စစ်အုပ်စုဘက်မှ ညောင်ဦးနဲ့ မကွေးလေတပ်တို့မှ Mi 35 ၂ စီး၊ ဂျက်ဖိုက်တာ ၂ စီး၊ ပခုက္ကူ တပ်မ၁၀၁ မှ ဒရုန်း၂စီး အသုံးပြုကာ တိုက်ခိုက်ခြင်းဖြစ်တယ်လို့ သိရပါတယ်။

အဆိုပါတိုက်ခိုက်မှုကြောင့် အသက်(၁)နှစ်အရွယ် နဲ့ အသက်(၁၀)နှစ်ရွယ်ကလေးတွေအပါ ပြည်သူ(၁၂)ဦးထိသေဆုံးပြီး ပြည်သူ(၂)ဦးဒဏ်ရာရကာ နေအိမ်(၄)လုံး ပျက်စီးခဲ့ရတယ်လို့ သိရပါတယ်။

ဒါ့အပြင်နောက်ဆက်တွဲအနေဖြင့် လေကြောင်းတိုက်ခိုက်မှုအရှိန်ကြောင့် နွား(၂)ကောင်လည်း ပြင်းထန်ဒဏ်ရာတွေဖြင့် သေဆုံးခဲ့ရပြီး အနီးအနားက သစ်ကြီးတော၊ ဝက္ကတော၊ ပိတ်သင်းကပ်နဲ့ သစ်ခေါက်ဆိပ်ရွာတွေက ဒေသခံတွေလည်း ထွက်ပြေးတိမ်းရှောင်နေရတယ်လို့ အမျိုးသားညီညွှတ်ရေးအစိုးရ(NUG)မှ ထုတ်ပြန်ထားပါတယ်။

အာရက္ခတပ်တော် AA ရဲ့ ရခိုင်ထိုးစစ်ဟာ စစ်တွေ ဒကစ နားအထိရောက်ရှိလာချိန်မှာပဲ စစ်လော်ဘီ Telegram Channel တွေကနေ ငပြီကျွန်းနဲ့ ပုဏ္ဏားကျွန်း တိုက်ပွဲတွေဟာ AA ဘက်က ထိခိုက်သေဆုံးမှုများနေတယ်ဆိုပြီး Video File တွေနဲ့ တစ်ပြိုင်နက်တည်း ဝါဒဖြန့်လာနေကြပါတယ်။

စစ်ကောင်စီရဲ့ နာမည်ကြီးဝါဒဖြန့်တယ်လီဂရမ်ချန်နယ်တွေဖြစ်တဲ့ ရွှေဘ၊ KS News၊MNPအပါ အခြားတယ်လီဂရမ် Channel များစွာကနေ အောက်တိုဘာလ ၁၇ ရက်နေ့ ညနေပိုင်းလောက် ကစပြီး ပုဏ္ဏားကျွန်းတိုက်ပွဲ၊ ငပြီကျွန်းတိုက်ပွဲတွေမှာ AA ဘက်က အထိနာနေတယ်ဆိုပြီး Video တွေနဲ့တကွ တစ်ပြိုင်နက်တည်း တင်လာကြပါတယ်။

စစ်ကောင်စီဘက်က အခုဝါဒဖြန့်နေတဲ့ ပေါက် တောမြို့နယ်ထဲက ငပြီကျွန်းနဲ့ ပုဏ္ဏားကျွန်းမြို့ နယ်တို့ကို ပြီးခဲ့တဲ့ အပတ်တွေကတည်းက စစ် ကောင်စီဟာ အင်အားအလုံးအရင်းနဲ့ ထိုးစစ်ဆင်ခဲ့တာဖြစ်ပြီး ထိုစဥ်ကလည်း စစ်လော်ဘီချန်နယ်တွေကနေ အဆိုပါ ဒေသတွေမှာ စစ်ရေးအောင်မြင်နေပြီး စကစတပ် က ထိန်းချုပ်သွားနိုင်ပြီဆိုပြီး ဝါဒဖြန့်ခဲ့ကြပါသေးတယ်။

သို့သော် မြေပြင်သတင်းရင်းမြစ်တွေရဲ့အဆိုအရ စစ်လော်ဘီတွေ ဝါဒဖြန့်နေတဲ့အဆိုပါ ငပြီကျွန်းနဲ့ ပုဏ္ဏားကျွန်းဘက်တွေမှာ တိုက်ပွဲတွေပြင်းထန်နေပြီး စစ်တပ်ဘက်ကအထိနာကာဆုတ်ခွါနေရတယ်လို့ BBM အနေနဲ့သိထားရပါတယ်။

ဒါတင်မက အာရက္ခတပ်တော်ရဲ့ တန်ပြန်ထိုးစစ် တွေဟာလည်း စစ်တွေမြို့ပတ်ချာလည်အထိရောက်ရှိလာနေပြီး အမြင့်ကျွန်းကျေးရွာအနီးက စကစရဲ့ ကာကင်းစခန်းတွေနဲ့ ရေချမ်းပြင်အနီးက ကာကင်းစခန်းအချို့ကိုပါ သိမ်းပိုက်ရရှိထားတယ်လို့လည်း သိရပါတယ်။

ဒါ့အပြင် ပြီးခဲ့တဲ့ အောက်တိုဘာ(၁၇) ရက်နေ့ (မနေ့)ကလည်း စစ်တွေရှိ အမှတ် (၉၀၈) စစ် မြေပြင်အင်ဂျင်နီယာတပ်ရင်းကို အာရက္ခတပ် တော်မှ သိမ်းပိုက်နိုင်ပြီဆိုပြီး သတင်းတွေကျယ်ကျယ်လောင်လောင် ထွက်ပေါ်လာပါသေးတယ်။

အဆိုပါသတင်းနဲ့ပတ်သတ်ပြီး BBM အနေနဲ့ သီးခြားအတည်ပြုနိုင်ခြင်းမရှိသေးပေမဲ့ စစ်တွေဒကစ နားအထိပင် အာရက္ခတပ်တော်ရောက်ရှိနေပြီး တိုက်ပွဲတွေလည်း ပြင်းထန်နေတယ်ဆိုတာကိုတော့ သတင်းရင်းမြစ်အချို့က အတည်ပြုပေးထားပါတယ်။

ဒါ့အပြင် စစ်တွေမြို့တိုက်ပွဲတွေကြောင့် ဒေသခံပြည်သူအချို့ စတင်စစ်ဘေးရှောင်နေကြသလို စစ်ကောင်စီတပ်ဘက်မှ အရာရှိအချို့လည်း ထွက်ပြေးတိမ်းရှောင်မှုတွေ ရှိနေတယ်လို့ သိရပါတယ်။

Photo-ပုံဟောင်း

ချင်းပြည်နယ်၊ ကန်ပက်လက်မြို့နယ်၊ ဘောင်ဘင်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ အရပ်သားတစ်ဦး ဒဏ်ရာရပြီး နေအိမ် ၆ လုံးထက်မနည်း ပျက်စီးသွားတယ်လို့ ဒေသခံတွေက BBM ကို ပြောပါတယ်။

မနေ့ စက်တင်ဘာ ၁၉ ရက်ရက်နေ့၊ နံနက် ၇ နာရီခွဲဝန်းကျင်မှာ တံတားဦးလေတပ်စခန်းမှ တက်လာသော ဂျက်ဖိုက်တာ (၂) စီးဟာ ကန်ပက်လက်မြို့နယ်၊ ဘောင်ဘင်ကျေးရွာကို ရှေ့ဆင့်နောက်ဆင့် ဗုံးကြဲတိုက်ခိုက်ခဲ့တာဖြစ်ပါတယ်။

အဲဒီဗုံးကြဲတိုက်ခိုက်မှုကြောင့် ဘောင်ဘင်ကျေးရွာက နေအိမ် ၆ လုံးထက်မနည်း ပျက်စီးသွားပြီး အရပ်သားတစ်ဦးမှာလည်း ထိခိုက်ဒဏ်ရာရရှိခဲ့တယ်လို့ သိရပါတယ်။

“ဂျက်ဖိုက်တာနှစ်စီးနဲ့ ဗုံးသီး ၃ လုံးလောက် ကြဲချသွားတယ်။ အရပ်သားတစ်ယောက် ဒဏ်ရာရတယ်။ နေအိမ် ၆ လုံးလောက် ထိခိုက်ပျက်စီးသွားတယ်။ အဲဒီထဲမှာ လုံးဝ ပျက်စီးသွားတဲ့ နေ အိမ်လည်းပါတယ်”လို့ ကန်ပက်လက်ဒေသခံတစ်ဦးက BBM ကို ပြောပါတယ်။

ကန်ပက်လက်မြို့နယ်အတွင်း စစ်တပ်က လေကြောင်းရန်ကို ပိုမိုအသုံးပြုတိုက်ခိုက်လျက်ရှိရာ ပြီးခဲ့တဲ့ စက်တင်ဘာ ၁၆ ရက်ကလည်း မောချောင်းရွာကို လေကြောင်း ဗုံးကြဲတိုက်ခိုက်ခဲ့ပါတယ်။

အဲဒီဗုံးကြဲတိုက်ခိုက်မှုကြောင့် ကျေးရွာအတွင်းရှိ စာသင်ကျောင်း ထိခိုက်ပျက်စီးခဲ့ပြီး ဒေသခံပြည်သူတွေမှာ ရွာလုံးကျွတ် ဘေးလွတ်ရာ ထွက်ပြေးတိမ်းရှောင်နေကြရဆဲဖြစ်တယ်လို့ သိရပါတယ်။

စစ်ကိုင်းတိုင်း၊ ကလေးမြို့၊ မွန်လိုင်ရပ်ကွက်မှာ နာရေးကူညီဖို့ မဏ္ဍပ်ထိုးနေတဲ့ ချင်းလူငယ် ၂ ဦးကို စစ်ကောင်စီတပ်ဖွဲ့ဝင်တွေက အကြောင်းမဲ့ ဝင်ရောက်ဖမ်းဆီးခဲ့ပြီး ငွေကျပ် သိန်းရာနဲ့ချီ တောင်းခံခဲ့တယ်လို့ ဒေသခံတွေဆီက သိရပါတယ်။

ဖြစ်စဉ်မှာ စက်တင်ဘာလ ၁၄ ရက်နေ့ က မွန်လိုင်ရပ်ကွက်ရှိ MZBC အသင်းတော်ဝင်တစ်ဦးရဲ့ နေအိမ်နာရေးမှာ မဏ္ဍပ်ကူညီဆောက်လုပ်ပေးနေစဉ် စစ်ကောင်စီတပ်ဖွဲ့ဝင်တွေက ရုတ်တရက် ဝင်ရောက်ဖမ်းဆီးသွားတာဖြစ်ပါတယ်။

ဖမ်းဆီးခံရသူတွေအနက် Pu Lal Rin Zual ရဲ့ သားဖြစ်သူမှာ မိသားစုဝင်တွေက ငွေကျပ် သိန်း ၂၀၀ ပေးဆောင်ခဲ့ရသဖြင့် ဖမ်းဆီးခံရတဲ့နေ့မှာပင် ပြန်လည်လွတ်မြောက်လာခဲ့တယ်လို့ သိရပါတယ်။

ဒါပေမဲ့ ၎င်းနဲ့ အတူ ပါသွားတဲ့ အခြားချင်းလူငယ်တစ်ဦးမှာမူ အခုအချိန်အထိ ဆက်လက်ထိန်းသိမ်းခံထားရဆဲဖြစ်ပြီး စစ်ကောင်စီတပ်ဘက်က မည်မျှငွေညှစ်တောင်းခံထားနေတာကို အတိအကျ မသိရသေးဘူးလို့ ဆိုပါတယ်။

“နာရေး မဏ္ဍပ်ဆောက်ကြတာပါ။ စစ်သားတွေ ရုတ်တရက် ဝင်ရောက်လာပြီး လူငယ်တွေ အကြောင်းမဲ့ ဖမ်းသွားတာ။ တစ်ယောက်ကတော့ ငွေသိန်း ၂၀၀ ပေးလို့ ချက်ချင်း ပြန်လွှတ်တယ်။ နောက်တယောက်ကတော့ ပြန်မလွတ်သေးဘူး။ သူဆီကလည်း ဘယ်လောက်ထိ ငွေညှစ်မလဲမသိဘူး။” လို့ ကလေးမြို့ခံတစ်ဦးက BBM ကို ပြောပါတယ်။

ကလေးမြို့နယ်အတွင်းမှာ စစ်ကောင်စီတပ်နဲ့ ၎င်းတို့ရဲ့ လက်အောက်ခံ ပြည်သူ့စစ်တွေဟာ ဒေသခံလူငယ်တွေနဲ့ အရပ်သားတွေကို ပစ်မှတ်ထားကာ ဖမ်းဆီးငွေညှစ်တဲ့ လုပ်ရပ်တွေကို ဆက်တိုက်ကျူးလွန်လျက်ရှိပါတယ်။
ဒါ့အပြင် စက်တင်ဘာ ၁၆ ရက်နေ့ကလည်း တောင်ဖီလာရပ်ကွက်ရှိ နေအိမ်တစ်လုံးကို နက်ပြာရောင်ဝတ် ပြည်သူ့စစ်တွေက ဝင်ရောက်စီးနင်းခဲ့သေးပါတယ်။

နေအိမ်အတွင်းရှိ လူငယ် ၂ ဦးမှာ အချိန်မီ ထွက်ပြေးလွတ်မြောက်သွားခဲ့ပေမဲ့လည်း ကျန်ရစ်ခဲ့တဲ့ မိခင်ဖြစ်သူကို ဖမ်းဆီးမယ်လို့ ခြိမ်းခြောက်ကာ ငွေကျပ် သိန်း ၃၀ ပေးဆောင်ဖို့နဲ့ စက်တင်ဘာလကုန် နောက်ဆုံးထားကာ ငွေအကျေပေးရမယ်လို့ အကျပ်ကိုင် ငွေတောင်းခံသွားခဲ့တယ်လို့ သိရပါတယ်။

စစ်ကောင်စီက ကုန်သွယ်ရေးအတွက်ကော၊ ထောက်ပံ့ပို့ဆောင်ရေးအတွက်ပါ အရေးပါတဲ့ မုံရွာ-ယာကြီး-ကလေးဝ လမ်းပိုင်းကို အပြည့်အဝ ထိန်းချုပ်နိုင်ဖို့အတွက် စစ်အင်အားထောင်ချီသုံးပြီး စုဖွဲ့ပြင်ဆင်နေသလို လမ်းပိုင်းပြင်ဆင်ရေးအတွက် ပြည်သူတွေကို ချောဆွဲဖို့ဆောင်ရွက်မှုတွေရှိနေတယ်လို့လည်း မြေပြင်သတင်းရင်းမြစ် တွေထံက သိရပါတယ်။

အိန္ဒိယ-ထိုင်း-မြန်မာ ကုန်သွယ်ရေးလမ်းကြောင်းရဲ့ တစိတ်တပိုင်းဖြစ်တဲ့ အဆိုပါ မုံရွာ-ယာကြီး-ကလေးဝ လမ်းပိုင်းကို စကစ ဟာ ပြီးခဲ့တဲ့ မေလကတည်း က စစ်ကြောင်းထိုးလာခဲ့တာဖြစ်ပြီး လမ်းတစ်လျှောက် တိုက်ပွဲတွေပြင်းထန်ပြီးနောက် ဇွန်လနဲ့ ဇူလိုင်လအတွင်းမှာ လမ်းပိုင်းတစ်ခုလုံးကို အပြည့်အဝ ထိန်းချုပ်နိုင်ပြီဆိုပြီး စစ်တပ်ဘက် ထုတ်ပြန်ခဲ့ပါတယ်။

ဒါပေမဲ့လည်း မြေပြင်တော်လှန်ရေးတပ်ဖွဲ့တွေနဲ့ သတင်းရင်းမြစ်တွေကတော့ မိုင်ပေါင်း ၁၁၅ မိုင်ထိရှည်တဲ့ မုံရွာ-ယာကြီး-ကလေးဝ လမ်းပိုင်းတစ်ခုလုံးကို စစ်တပ်ကထိန်းချုပ်နိုင်ပြီလို့ ထုတ်ပြန်တာဝါ ဝါဒဖြန့်မှုသာဖြစ်ပြီး နေရာအချို့မှာသာ စစ်တပ်ဘက်က ထိန်းချုပ်ထားနိုင်ခြင်းဖြစ်တယ်လို့လည်း ဆိုထားပါတယ်။

အခုအခါမှာတော့ အဲ့ဒီလမ်းပိုင်းကို အပြည့်အဝထိန်းချုပ်နိုင်ဖို့အတွက် စကစ ဟာ မုံရွာကော၊ စစ်ကိုင်းဘက်ကပါ အင်အားထောင်ချီစုဖွဲ့နေပြီး ပြင်ဆင်နေသလို လမ်းပိုင်းတစ်ခုလုံး ပြုပြင်ဖို့အတွက်လည်း အရပ်သားပြည်သူတွေကိုချောဆွဲဖို့ ဆောင်ရွက်နေတာတွေရှိတယ်လို့ မြေပြင်သတင်းရင်းမြစ်တစ်ယောက်က BBM ကိုပြောပါတယ်။

“မုံရွာ-ယာကြီး လမ်းပိုင်းကို စကစတွေ ထိုးစစ်ဆင်ဖို့လုပ်နေတယ်၊ အိန္ဒိယနဲ့ကုန်သွယ်ဖို့လို့ကြားတယ်၊ သတင်းရတာကတော့ ခပ်မြန်မြန်ပဲ စစ်ကြောင်းထိုးလာလိမ့်မယ်၊ မုံရွာကော၊ စစ်ကိုင်းဘက်ကပါ အင်အားတွေပါမှာပေါ့”

ဒါ့အပြင် အခုရက်ပိုင်းအတွင်း မုံရွာမြို့အခြေစိုက် နမခ တိုင်းစစ်ဌာနချုပ်အတွင်းမှာလည်း တပ်မ (၃၃) အပါ စကစ အင်အားထောင်ချီလောက်နဲ့ စုဖွဲ့မှုတွေရှိနေတယ်လို့ သိရပြီး ဒီလမ်းပိုင်းကိုသာ အပြည့်အဝထိန်းချုပ်သွားနိုင်ပါက စစ်ကိုင်း၊မုံရွာမှတဆင့် ချင်းပြည်နယ်အထိကိုပါ ကုန်းကြောင်းမှ စစ်အင်အားရွှေ့ပြောင်းတာတွေ ပိုမိုလွယ်ကူစွာဆောင်ရွက်နိုင်ချေရှိတယ်လို့လည်း ဆက်ပြောပါတယ်။

“ဒီလမ်းပိုင်းက ပွင့်သွားရင် အိန္ဒိယနဲ့ကုန်သွယ်ရုံတင်မကဘူး ချင်းပြည်အထိပါ စစ်ကြောင်းတွေသွားနိုင်တယ်”

မင်းအောင်လှိုင် ရဲ့ အိန္ဒိယခရီးစဥ်အတွင်း အဆိုပါလမ်းပိုင်းအပါ အိန္ဒိယနယ်စပ်လုံခြုံရေးအတွက် ဆွေးနွေးမှုတွေရှိခဲ့တယ်လို့ စကစ ဘက်က ဆိုထားသလို မင်းအောင်လှိုင်ခရီးစဥ်

အပြီးမှာ အိန္ဒိယနယ်စပ် ကလေး-တမူးလမ်းပိုင်းနဲ့ အခု မုံရွာ-ယာကြီး-ကလေးဝ လမ်းပိုင်းတွေကို ပိုမိုဖိဖိစီးစီး ထိုးစစ်ဆင်လာတယ်လို့ သိရပါတယ်။

အဆိုပါလမ်းပိုင်း(၂)ခုနဲ့ပတ်သတ်ပြီး စစ်တပ်ဘက်က အပြည့်အဝထိန်းချုပ်နိုင်ပြီဆိုပြီး ထုတ်ပြန်ထားပေမဲ့ တော်လှန်ရေးအင်အားစုတွေဘက်ကတော့ တိုက်ပွဲတွေဆက်လက်ရှိနေဆဲသာဖြစ်တယ်လို့ တုံ့ပြန်ပြောဆိုမှုတွေရှိနေပါတယ်။

Photo-ပုံဟောင်း

အာရက္ခတပ်တော် – AA နဲ့ စစ်ကောင်စီတပ်တို့ တိုက်ပွဲတွေပြင်းထန်နေတဲ့ ရခိုင်ပြည်၊ စစ်တွေမြို့နယ်မှာ စစ်ကောင်စီတပ်ကနေပြီတော့ ဗဟိုမဏ္ဍပ်ကြီးတွေဆောက်လုပ်ကာ သင်္ကြန်ပွဲကျင်းပပြုလုပ်ဖို့ ပြင်ဆင်နေတယ်လို့ စစ်တွေမြို့နယ်ရှိ ဒေသခံတွေဆီက သိရပါတယ်။

စစ်တွေမြို့ပေါ်မှာ စစ်ကောင်စီတပ်ဟာ သင်္ကြန်ပွဲကျင်းပပြုလုပ်ဖို့အတွက် ဆရာတော် ဦးဥတ္တမ ပန်းခြံရှေ့မှာ ဗဟိုမဏ္ဍပ်ကြီးတွေဆောက်လုပ်နေသလို အစိုးရရုံးရှေ့နဲ့ မိဇံရပ်ကွက်ရှိ ကမ်းနားလမ်းနေရာတွေမှာပါ ဗဟိုမဏ္ဍပ်ကြီးတွေဆောက်လုပ်နေတယ်လို့ စစ်တွေဒေသခံတွေဆီက သိရပါတယ်။

“အရင်နှစ်တွေကလိုပဲ ဒီနှစ်မှာလည်း စစ်တွေမှာ သင်္ကြန်ပွဲကျင်းပဖို့အတွက် စစ်ကောင်စီတပ်က ပြင်ဆင်နေတာရှိပါတယ်။ အခုဆိုရင် ဗဟိုမဏ္ဍပ်ကြီးတွေ ဆောက်လုပ်နေကြတာရှိပါတယ်။ တိုက်ပွဲတွေ ဖြစ်နေပေမဲ့လည်း စကစက စစ်တွေမှာ သင်္ကြန်ပွဲကို မဖြစ်၊ ဖြစ်အောင် ကျင်းပပြုလုပ်ဖို့ ပြင်ဆင်နေတဲ့ သဘောဖြစ်ပါတယ်” လို့ စစ်တွေဒေသခံတစ်ဦးက BBM ကို ပြောပါတယ်။

အလားတူ စစ်ကောင်စီတပ်ဟာ သူဝန်ထမ်းတစ်ချို့ကို သင်္ကြန်ကာလအတွင်း ဖျော်ဖြေပေးနိုင်ဖို့အတွက် အတီး၊ အက၊ အဆိုတွေတိုက်နေကြသလို မြို့ပေါ်ရှိ ဒေသခံလူထုတွေကိုလည်း သင်္ကြန်ကာလအတွင်း နေအိမ်အတွင်းမှာမနေဘဲ အပြင်ထွက်ရေကစားကြဖို့ တိုက်တွန်းနှိုးဆော်မှုတွေကိုပင် ပြုလုပ်နေကြပြီး ဖြစ်တယ်လို့လည်း စစ်တွေဒေသခံအမျိုးသမီးတစ်ဦးက ပြောပါတယ်။

တစ်ဖက်မှာလည်း အာရက္ခတပ်တော် – AA ဟာ အခုနှစ် မတ်လဆန်းပိုင်းကတည်းပင် စစ်တွေမြို့နယ်ရှိ ရွှေမင်းဂံရေတပ်စခန်းနဲ့ ဒေသကွပ်ကဲမှုစစ်ဌာနချုပ် (ဒကစ) အနီးရှိကာကင်းစခန်းတွေကို ထိုးစစ်ဆင်တိုက်ခိုက်နေတာဖြစ်ပြီး တိုက်ပွဲတွေမှာလည်း နှစ်ဖက်ပြင်းထန်စွာ ဖြစ်ပွားနေတာ ဖြစ်ပါတယ်။

အခုလို တိုက်ပွဲတွေ ပြင်းထန်မှုရှိနေပေမဲ့လည်း စစ်ကောင်စီတပ်ဟာ သူတို့ထိန်းချုပ်ထားတဲ့ စစ်တွေမြို့ တည်ငြိမ်အေးချမ်းနေတာကို ပြသဖို့အတွက် သင်္ကြန်ပွဲကို ကျင်းပပြုလုပ်ဖို့ ပြင်ဆင်နေတာဖြစ်တယ်လို့လည်း စစ်တွေဒေသခံတွေဆီက သိရပါတယ်။

“တိုက်ပွဲပြင်းထန်နေတာကြောင့် စစ်တွေမှာဆိုရင် စကစက အင်အားတွေအဆက်မပြတ် ဖြည့်တင်းနေတာရှိပါတယ်။ မြို့ပေါ်နဲ့အနီးမှာ တိုက်ပွဲတွေပြင်းထန်နေပေမဲ့လည်း စကစက မြို့ပေါ်မှာ တည်ငြိမ်အေးချမ်းနေတာကို ပြသဖို့အတွက် သင်္ကြန်ပွဲကျင်းပပြုလုပ်ဖို့ ပြင်ဆင်နေတာဖြစ်ပါတယ်။ အခုလည်းမြို့ထဲမှာ ဗဟိုမဏ္ဍပ်ကြီးတွေ ဆောက်လုပ်နေသလို တစ်ဖက်မှာလည်း လက်နက်ကြီးပစ်ခတ်သံတွေကို နေ့တိုင်းလိုလို ကြားနေရပါတယ်” လို့ စစ်တွေဒေသခံတစ်ဦးက BBM ကို ပြောပါတယ်။

စစ်ကောင်စီတပ်ဟာ စစ်တွေမြို့ပေါ်ကို အာရက္ခတပ်တော် AA ထိုးဖောက်ဝင်ရောက်လာမှာကို စိုးရိမ်တာကြောင့် တပ်အပြောင်းအလဲပြုလုပ်ကာ အင်အားဖြည့်တင်းမှုတွေလည်း အရင်ကထက်ပိုမိုပြုလုပ်လာနေတယ်လို့ စစ်တွေ စစ်ရေးသတင်းရင်းမြစ်တွေဆီက သိရပါတယ်။

ရခိုင်မှာ အာရက္ခတပ်တော် – AA ဟာ မြို့နယ် ၁၄ ခုအထိကို သိမ်းပိုက်ထိန်းချုပ်ထားတာဖြစ်ပြီး လက်ရှိမှာ စစ်တွေနဲ့ ကျောက်ဖြူမြို့နယ်တွေကို ထိုးစစ်အရှိန်မြှင့်တိုက်ခိုက်လာနေသလို တစ်ဖက်မှာလည်း ရခိုင်နယ်စပ်က မကွေး၊ ပဲခူးနဲ့ ဧရာဝတီတိုင်းတွေမှာလည်း တော်လှန်ရေးတပ်ဖွဲ့တွေနဲ့ ပူးပေါင်းကာ တိုက်ခိုက်နေတာလည်း ဖြစ်ပါတယ်။