CJ ၂၀၂၁ စစ်အာဏာသိမ်းတုန်းက ဒေါ်အောင်ဆန်းစုကြည်ဘက်က ရပ်တည်ခဲ့လို့ ရာထူးက ဖြုတ်ချခံရတဲ့ ဦးကျော်စွာမင်းဟာ သံအမတ်နေအိမ်ကနေ ထွက်မပေးလို့ တရားရင်ဆိုင်နေရပါတယ်။
ဗြိတိန်နိုင်ငံဆိုင်ရာ မြန်မာသံအမတ်ဟောင်း ဦးကျော်စွာမင်းဟာ ၂၀၂၁ တုန်းက သံရုံးထဲ၀င်ခွင့်မရဘဲ ပိတ်ဆို့ခံရပြီးနောက် သံအမတ်နေအိမ်ကနေ မဖယ်ပေးခဲ့လို့ ကျူးကျော်ဝင်ရောက်မှုနဲ့ လန်ဒန်တရားရုံးမှာ တရားရင်ဆိုင်နေရပါတယ်။
စစ်တပ်က အာဏာသိမ်းပြီးနောက် ပြည်သူ့ပါတီ ခေါင်းဆောင် ဒေါ်အောင်ဆန်းစုကြည်ဘက်က ရပ်တည်ကြောင်း ထုတ်ဖော်ပြောခဲ့လို့ ဦးကျော်စွာမင်းဟာ သံရုံးထဲ ဝင်ခွင့်မရတော့ဘဲ ပိတ်ဆို့ခံခဲ့ရတာပါ။
သူဟာ လန်ဒန်မြို့ အနောက်မြောက်ပိုင်းက သံအမတ်ကြီးနေအိမ်မှာ ဆက်နေနေတာဖြစ်ပြီး ၂၀၂၁ မေလကနေ ၂၀၂၄ နိုဝင်ဘာလအထိ သံတမန်အဆောက်အအုံမှာ ကျူးကျော်နေထိုင်မှုနဲ့ တရားစွဲခံထားရတာပါ။
ဒါပေမဲ့ ဩဂုတ်လ ၁၂ရက်နေ့ ရုံးချိန်းမှာတော့ သူ စွပ်စွဲခံထားရတာတွေအတွက် အပြစ်မရှိပါဘူးလို့ သူက လျှောက်လဲခဲ့ပါတယ်။
တိုင်းပြည်ကို စီးပွားရေး ပျက်စီးအောင်လုပ်ခဲ့တဲ့ စစ်ကောင်စီခေါင်းဆောင် မင်းအောင်လှိုင်ဟာ တရားမဝင်တာကြောင့် သူ့ကို ဒီအိမ်ကနေ ထွက်ခိုင်းဖို့ လုပ်ပိုင်ခွင့်မရှိဘူးလို့ ချေပထားပါတယ်။
တရားလိုရှေ့နေ Louise Oakley က “သံအမတ်ကြီးအဖြစ်ဆိုရင် အိမ်တော်မှာ နေထိုင်ခွင့် ရခဲ့ပေမဲ့ ရာထူးက ဖယ်ရှားခံရပြီးနောက်ပိုင်း ထွက်မပေးဘဲ ငြင်းဆန်ခဲ့တာကြောင့် သံတမန်နယ်မြေ ကျူးကျော်မှု ပြစ်မှုမြောက်ပါတယ်” လို့ ပြောပါတယ်။
ဦးကျော်စွာမင်းရဲ့ ရှေ့နေ David Perry ကတော့ စစ်ကောင်စီဟာ ၎င်းရဲ့ နေထိုင်ခွင့်ကို တရားဝင် ရုပ်သိမ်းပိုင်ခွင့် မရှိသလို ဒီအိမ်ကိုလည်း တရားဝင် သုံးစွဲပိုင်ခွင့် မရှိပါဘူးလို့ တရားရုံးမှာ လျှောက်လဲခဲ့ပါတယ်။
ဦးကျော်စွာမင်းဟာ စစ်တပ်မှာ တာဝန်ထမ်းဆောင်ခဲ့ဖူးပြီးမှ ဒေါ်အောင်ဆန်းစုကြည် အစိုးရလက်ထက်မှာ သံအမတ် ဖြစ်လာခဲ့သူပါ။
၂၀၂၁ အာဏာသိမ်းစကတည်းက မြန်မာနိုင်ငံဟာ ပြည်တွင်းစစ်ဆီ ဦးတည်သွားလိမ့်မယ်လို့ ကြိုတင်ခန့်မှန်းခဲ့သူလည်း ဖြစ်ပါတယ်။
Reference – The Guardian
