ဦးထွန်း

ချောင်းဦးမှာ မီးထွန်းသူတွေကို ပါရာမော်တာနဲ့ ဗုံးကြဲချလို့ ၁၀ ဦးကျော်သေဆုံး

စစ်ကိုင်းတိုင်း မုံရွာမြို့မှာ အာဏာသိမ်း စစ်ကောင်စီက သီတင်းကျွတ်ကာလ ပျော်ပွဲရွှင်ပွဲ ပြုလုပ်ပေးပြီးနောက် မုံရွာခရိုင်ထဲက ကျေးရွာတွေမှာ ဆီမီးထွန်းသူတွေကို Paramotor – စက်တပ်လေထီး နဲ့ ဗုံးကြဲချလို့ ဒေသခံ ဆယ်ဦးထက်မနည်း သေဆုံးတယ်လို့ ဒေသခံ သတင်းရင်းမြစ်ထံမှသိရပါတယ်။

ပြည်သူ့ဥယျာဉ်ခေါ် မုံရွာမြို့ ကျောက္ကာလမ်းနဲ့ အနော်ရထာလမ်းထောင့်က ကွန်ကရစ်တမံသလင်းခင်း ကွင်းပြင်မှာ စစ်ကောင်စီက ပျော်ပွဲရွှင်ပွဲ လုပ်ပေးပြီး တချိန်တည်းမှာပဲ မုံရွာနဲ့ ချောင်းဦးနယ်အစပ် ကျေးရွာတစ်ရွာမှာ သီတင်းကျွတ်ဆီမီးထွန်းနေသူတွေကို ဗုံးကြဲသတ်တာ ဖြစ်ပါတယ်။

မုံရွာခရိုင်၊ ချောင်းဦးနယ်အစပ်မှာ သီတင်းကျွတ်လပြည့်နေ့ည ဆီမီးထွန်းသပိတ်ပြုလုပ်နေတဲ့ နေရာကို စစ်အုပ်စုက စက်တပ်လေထီးနဲ့ ဗုံးလာကြဲခဲ့တာကြောင့် ဆယ်ဦးထက်မနည်း သေဆုံးပြီး အများအပြား ထိခိုက်ဒဏ်ရာတွေရရှိထားတယ်လို့ ဒေသခံ သတင်းရင်းမြစ်ထံမှ သိရပါတယ်။

ချောင်းဦးမြို့နယ် မြောက်ခြမ်းတနေရာမှာ အောက်တိုဘာ ၆ ရက် သီတင်းကျွတ်လပြည့်နေ့ ည ရှစ်နာရီ ဝန်းကျင်မှာ စစ်အာဏာရှင်ဆန့်ရှင်ရေး ဆီမီးထွန်းသပိတ်ပြုလုပ်နေချိန်မှာ ပါရာမော်တာနဲ့ ဗုံးကြဲတိုက်ခိုက် ခဲ့တာလို့ ဆိုပါတယ်။ အနောက်မြောက်တိုင်း စစ်ဌာနချုပ် – မုံရွာကနေ တက်လာတဲ့ ပါရာမော်တာနဲ့ ၁၂၀ မမ ဗုံးသီး နှစ်လုံး ကြဲချတိုက်ခိုက်သွားခဲ့တာဖြစ်တယ်လို့ ဒေသခံ သတင်းရင်းမြစ်တစ်ဦးက ပြောပါတယ်။

“မုံရွာနဲ့ ချောင်းဦးနယ်အစပ်က ဆီမီးထွန်းသပိတ်ကို ပါရာမော်တာနဲ့လာပြီးတော့ ၁၂၀ မမ ဗုံးသီး နှစ်လုံးချပြီး တိုက်ခိုက်တာ ခံခဲ့ရပါတယ်။ လောလောဆယ် သိရသလောက်ကတော့ ၁၀ ဦးကျော်လောက်ရှိတယ် သေဆုံးတာက။ ဒဏ်ရာရတာတွေကလည်း အတော်လေးများတယ်။ ခြေပြတ် လက်ပြတ်တဲ့သူတွေရော ရှိနေတာ။ ဆေးကုသပေးဖို့ အတော်လေးအခက်အခဲဖြစ်နေတယ်”လို့ ကူညီကယ်ဆယ်ရေးလုပ်နေသူတစ်ဦးကပြောပါတယ်။

စစ်ကောင်စီရဲ့ စက်တပ်လေထီးနဲ့ ဗုံးကြဲချခဲ့တာကြောင့် ကလေးငယ်တွေအပါဝင် သေဆုံးသူ ၁၀ ဦးထက်မနည်းနဲ့ ထိခိုက်ဒဏ်ရာရသူ ၃၀ ကျော်ရှိတယ်လို့သိရပြီး ထိခိုက်ဒဏ်ရာရသူတွေကို ဆေးဝါးကုသပေးဖို့ အခက်အခဲတွေရှိနေတယ်လို့လည်း ဆိုကြပါတယ်။

ချောင်းဦးမြို့နယ်ထဲမှာ စစ်ကောင်စီက ကျေးရွာတွေကို တိုက်ပွဲမရှိဘဲ စက်တပ်လေထီးနဲ့ လေကြောင်းကနေ ဗုံးကြဲသတ်ဖြတ်တာ၊ လက်နက်ကြီးတွေနဲ့ပစ်ခတ်တာတွေကြောင့် ဒေသခံပြည်သူတွေ မကြာခဏ ထိခိုက်သေဆုံးတာတွေ ဖြစ်ပေါ်နေတယ်လို့ ဒေသခံတွေက ဆိုပါတယ်။

အောက်တိုဘာလ ၆ ရက်နေ့မှာပဲ ရှမ်းပြည်နယ်မြောက်ပိုင်းက နမ္မတူမြို့နဲ့ သီပေါမြို့တို့ကို စစ်ကောင်စီက လေကြောင်းကနေ ဗုံးကြဲခဲ့တာကြောင့် ခြောက်ဦးထက်မနည်း ဒဏ်ရာရခဲ့ပါတယ်။

ကရင်ပြည်နယ်၊ ဘားအံမြို့နယ်မှာ Billboard ကြော်ငြာဆိုင်းဘုတ်ပေါ်တက်ပြီး ခုန်ချခဲ့တဲ့ လူငယ်တစ်ဦးကို ကယ်တယ်နိုင်ခဲ့တယ်လို့ ဘားအံမြို့နယ် မီးသတ်တပ်ဖွဲ့က ထုတ်ပြန်ထားပါတယ်။

၂၀၂၅ခုနှစ် စက်တက်ဘာ ၁၈ ရက်နေ့ ညနေ ၅ နာရီကျော်က ကရင်ပြည်နယ်၊ ဘားအံမြို့နယ်၊ ဘားအံ-လှိုင်ဘွဲ ကားလမ်းဘေး မဲဘောင်တံတားနားက ဆိုင်းဘုတ်ပေါ်ကို လူ ၁ ယောက်တက်နေတယ်လို့ သတင်းရတာကြောင့် ဘားအံခရိုင်မီးသတ်စခန်းက လှေကားတင်ယာဉ် ၁ စီး၊ ရှာဖွေကယ်ဆယ်ရေးတပ်ဖွဲ့ဝင်တွေနဲ့ ကယ်ဆယ်ရေးသွားလုပ်ခဲ့တယ်လို့သိရပါတယ်။

“ညနေ ၆ နာရီလောက်မှာ လှေကားတင်ယာဉ်နဲ့ ကယ်ဖို့လုပ်နေတုန်း ဆိုင်းဘုတ်နားကို လှေကားရောက်တဲ့အချိန် လူငယ်က ခုန်ချခဲ့ပေမဲ့ အောက်မှာ ကြိုတင်ပြင်ဆင်ထားတဲ့ လေမွေ့ရာပေါ်ကို ခုန်ချမိတာကြောင့် အသက်ရှင်လျက် ကယ်ဆယ်နိုင်ခဲ့တယ်”

လို့ ကယ်ဆယ်ရေးအဖွဲ့ဝင်တစ်ဦးက ပြောပြပါတယ်။

အဲဒီလူငယ်ကို ကယ်ဆယ်ရေးအဖွဲ့များက အကြိမ်ကြိမ် အားပေး​ပြောဆိုခဲ့ရပြီး နောက်ဆုံးမှာတော့ ကယ်ဆယ်ရေးလေအိတ်ပေါ်သို့ ခုန်ဆင်းနိုင်ခဲ့ပြီး ကယ်ဆယ်နိုင်ခဲ့တယ်လို့ ​ထုတ်ပြန်ချက်မှာ​ဖော်ပြထားပါတယ်။။

အဆိုပါ လူငယ်ကို အရေးပေါ် ဆေးရုံသို့ ပို့ထားပြီး ဆေးကုသမှုခံယူနေတယ်လို့ သိရပြီး အဲဒီခုန်ချဖို့ကြံစည်ခဲ့တဲ့ လူငယ်ဟာ တက္ကသိုလ်တွင် မြန်မာစာမေဂျာ လေ့လာနေတဲ့ ကျောင်းသားတစ်ဦးလည်းဖြစ်တယ်လို့ သိရပါတယ်။

ပုံ-ဘားအံ မီးသတ်

#BBM#News#UpdateNews#Suicide#Firestation

ရန်ကုန်-မြစ်ကြီးနား ၊မန္တလေး- မြစ်ကြီးနား လေယာဥ်လက်မှတ်ခများ အဆမတန်မြင့်တက်လာနေတယ်လို့ မြစ်ကြီးနားခရီးသည်တစ်ဦးထံမှ သိရပါတယ်။

စက်တင်ဘာ ၈ ရက်နောက်ပိုင်းကစပြီး ရန်ကုန်- မြစ်ကြီးနား လေယာဥ်လက်မှတ်ခနူန်းထားမှာ တကြောင်းစာအတွက် လေကြောင်းလိုင်းအမျိုးအစားအပေါ်လိုက်ပြီး အနိမ့်ဆုံး ၆ သောင်းခွဲကျပ်မှ အမြင့်ဆုံး ၈၆၀၀၀၀ ကျပ်ကျော်ရှိလာပြီးစက်တင်ဘာ ၈ ရက်မတိုင်ခင်က လေယာဥ်လက်မှတ်ခနူန်းထားမှာ ၆ သိန်းကျပ်ကျော်သာ ရှိခဲ့တာဖြစ်တယ်လို့သိရပါတယ်။

” ရန်ကုန် မြစ်ကြီးနာလေယာဥ်လက်မှတ်က ရှစ်သိန်းကျော်သွားပြီ ။ကိုယ်ကရက်အမြန်လိုလို့ ပွဲစားတွေနဲ့ ဝယ်မယ်ဆိုရင် ကိုးသိန်းကျော် ဆယ်သိန်းလောက်အထိပေးရတယ်။လေကြောင်းလိုင်းအပေါ်လိုက်ပြီးကွာတာပေါ့။ဘယ်လိုကြောင့် ဒီလောက်ထိတက်နေလဲ မသိပါဘူး။ ဘာကြောင့်တက်ရပါတယ်ဆိုတာမျိုးလည်းလေကြောင်းလိုင်းတွေက အသိပေးတာမရှိဘူး။ကိုယ်သွားချင်တဲ့ရက်နဲ့ လေယာဥ်လက်မှတ်အရောင်းကိုယ်စားလှယ်တွေဆီမှာရရင်တော့ ရောင်းစျေးအမှန်ရမှာပေါ့။ အဲဒါကလည်းသိပ်တော့မလွယ်ဘူး။ကားလမ်းတွေအဆင်မပြေလို့ လေယာဥ်အားကိုးမယ်ဆိုတော့ စျေးကခေါင်ခိုက်နေတယ်။”

လို့ ရန်ကုန် – မြစ်ကြီးနားကို လေယာဥ်ခရီးစဥ်နဲ့သွားရောက်ခဲ့သူ မြစ်ကြီးနားဒေသခံကပြောပါတယ်။ ရန်ကုန် – မြစ်ကြီးနား လေကြောင်း လက်မှတ်စျေးနူန်းတွေအဆမတန်မြင့်တက်မှုနဲ့အတူ မန္တလေး – မြစ်ကြီးနား လေယာဥ်လက်မှတ်စျေးနူန်းကလည်း ၄၀၀၀၀၀ ကျပ်ကျော်မှ ၅၀၀၀၀၀ ကျော်အထိရှိနေတယ်လို့သိရပါတယ်။

” စျေးလေးနည်းနည်းတော့တက်လာတယ် ။သောင်းဂဏန်းပါဘဲ။ပွဲစားကတဆင့် ဝယ်သူကတော့ ပုံမှန်ထက်ပိုများတယ်။ လက်မှတ်ခက ရက်အလိုက် စျေးနူန်းကအပြောင်းအလဲလည်းရှိပါတယ်။ “

လို့ လေယာဥ်လက်မှတ်အရောင်းကိုယ်စားလှယ်တစ်ဦးကပြောပါတယ်။ ရန်ကုန်မှ ဘန်ကောက်ကို လေယာဥ်လက်မှတ် တကြောင်းစာကိုမှ မြန်မာငွေ ၅ သိန်းကျော်သာရှိချိန်မှာ မြစ်ကြီးနား – ရန်ကုန် လေယာဥ်လက်မှတ်ခနူန်းထားက ၈ သိန်းကျော်အထိအဆမတန်မြင့်တက်လာတဲ့အပေါ် ဝေဖန်မှုတွေလည်းရှိနေပါတယ်။

” ကိုယ့်ပြည်တွင်း သွားတာကို ဒီလောက်ကြီးတက်တာကျ လွန်သွားပြီ။ ကားတွေလို့ လမ်းမှာဂိတ်ကြေးပေးရတာလည်းမရှိဘဲ မကြာခဏတက်နေတာ။”

လို့ မြစ်ကြီးနား ဒေသခံကပြောပါတယ်။ လက်ရှိမှာ မြစ်ကြီးနား – မန္တလေး – ရန်ကုန် လေကြောင်းခရီးစဥ်ကို မြန်မာအမျိုးသားလေကြောင်းလိုင်း ၊ မင်္ဂလာလေကြောင်းလိုင်း ၊ မန်းရတနာပုံလေကြောင်းလိုင်း တို့က လေယာဥ်ပြေးဆွဲပေးနေတာဖြစ်တယ်လို့သိရပါတယ်။

မြစ်ကြီး – မန္တလေး ကားလမ်းပိုင်းတလျှောက်မှာ မကြာခဏထိတွေ့တိုက်ပွဲဖြစ်ပွားမှုကြောင့် လမ်းမှာ ကားတွေ လနဲ့ချီပိတ်မိမှုတွေ ဖြစ်ပွားပြီး အရေးကြီးကိစ္စသွားလာဖို့လိုအပ်သူတွေဟာ လေကြောင်းခရီးစဥ်ကို သာအသုံးပြုနေကြရတာဖြစ်တယ်လို့သိရပါတယ်။

၂၀၂၁ဖေဖော်ဝါရီ၁ရက်နေ့ နောက်ပိုင်းဖြစ်စဉ်များတွင် NLDပါတီအစိုးရရဲ့ အဓိက ခေါင်းဆောင်တစ်ဦးဖြစ်သောသမ္မတဦး၀င်းမြင့်ရဲ့ တရားခံသက်သေထွက်ဆိုချက်မိတ္တူ လူမှုကွန်ရက်တွင် ထွက်ပေါ်လာခဲ့ပါတယ်။

နေပြည်တော် ဇမ္ဗူသီရိမြို့နဲ့ တရားရုံး က ၂၀၂၁ အောက်တိုဘာ ၁၂ ရက် သမ္မတ ဦးဝင်းမြင့်ကို စစ်ဆေးထားတဲ့ တရားခံ သက်သေ ထွက်ချက်မှာ ၂၀၂၁ ဖေဖေါ်ဝါရီ ၁ ရက်နေ့ မနက် ၅ နာရီအချိန် စစ်တပ်က ရောက်ရှိလာတဲ့ အပေါ် သမ္မတ ဦးဝင်းမြင့်က ‘’အကြမ်းဖက်စစ်သည်တော်တွေ’’ လို့ ထွက်ဆိုထားတာ ကို တွေ့ရပါတယ်။

ဒါ့အပြင် ကျန်းမာရေး အကြောင်းပြချက်နဲ့ ရာထူးက နုတ်ထွက်ပေးဖို့ စစ်တပ်က ပြောကြားရာ ‘’နုတ်ထွက်မပေးနိုင်ကြောင်း၊ အသက်အသေခံမည် ဖြစ်ကြောင်း’’ ပြောလိုက်တယ်လို့ ထွက်ဆိုတာကို ဖေါ်ပြထားပါတယ်။

သမ္မတ တာဝန်ထမ်းဆောင်နေစဥ် ပါတီလုပ်ငန်းတွေ ဆောင်ရွက်တယ် ဆိုတဲ့ စွပ်စွဲချက်တွေကိုလည်း သမ္မတ ဦးဝင်းမြင့်က အခြေအမြစ် မရှိကြောင်း ငြင်းဆိုထားပါတယ်။ဒါ့အပြင် CRPH NUG PDF အကြောင်းတွေ နဲ့ ပတ်သက်ပြီး ဖေဖေါ်ဝါရီ ၁ ရက်နေ့ မနက် ၅ နာရီ ကတည်းက ဖမ်းဆီးထိန်းသိမ်းခံလို့ ပြင်ပလောကနဲ့ အဆက်အသွယ်မရှိတဲ့ အတွက် မသိရှိကြောင်း ထွက်ဆိုထားပါတယ်။

NLD ဖေ့စ်ဘွတ် နဲ့ CRPH တို့ရဲ့ ထုတ်ပြန်ချက်တွေကိုလည်း အလားတူ မသိရှိကြောင်း ပြောကြားထားတာ ကို တွေ့ရပါတယ်။အဆိုပါအဖွဲ့အစည်းတွေက ဗုံးခွဲတိုက်ခိုက်မှုတွေ လက်နက်စွဲကိုင် တိုက်ခိုက်တာတွေနဲ့ ပြည်သူတွေကို ဒလန်ဆိုပြီး သတ်ဖြတ်တာတွေ အပေါ် လည်း သမ္မတ ဦးဝင်းမြင့် က ဖမ်းဆီးခံရကတည်းက အဆက်အသွယ် ပြတ်နေတဲ့ အတွက် မသိရှိကြောင်းသာ ထွက်ဆိုသွားခဲ့ပါတယ်။

၂၀၂၁ခုနှစ် အောက်တိုဘာ၁၂ရက်နေ့ ကဇမ္ဗူသီရိ တရားရုံး တွင် တရားခံသက်သေများအဖြစ် ဒေါ်အောင်ဆန်းစုကြည်နှင့် ဉီး၀င်းမြင့် တို့ သက်သေထွက်ဆိုချက်များဖြစ်ပြီး အဓိကအားဖြင့် NLDပါတီ အစိုးရကာလ သမ္မတအပါအ၀င် ခေါင်းဆောင်များအမည်ဖြင့် ပြည်သူထံပန်ကြားချက် ၊ CRPH /NUG /PDF ဖြစ်လာမှုအပေါ် ကြိုတင်သိရှိထားခြင်းရှိမရှိ၊ ပါဝင်မှုရှိမရှိကို တရားခံသက်သေများအဖြစ် စစ်ဆေးမေးမြန်းသည့် သက်သေထွက်ချက် မိတ္တုလည်း ဖြစ်ပါပြီး ယမန်နှစ်ကုန်ခါနီးတွင်လည်း ဒေါ်အောင်ဆန်းစုကြည်၏ သက်သေထွက်ချက်လည်းထွက်ပေါ်ခဲ့ပါတယ်။

ဒေါ်အောင်ဆန်းစုကြည်နှင့် ဉီး၀င်းမြင့်တို့ ၏သက်သေထွက်ဆိုချက်များအရလည်း အဆိုပါသက်သေပြဆိုချက်၊ တရားလိုရှေ့နေနှင့် အပြန်အလှန်မေးမြန်းချက်များအရ ပါတီကြေညာချက်များ၊ ပြည်သူ့ထံပန်ကြားချက်ဆိုသည့်ထုတ်ပြန်မှုများ၊ CRPH /NUG /PDF ဖြစ်လာမှုကို မသိရှိခြင်း ၎င်းတို့၏ သဘောထားမပါကြောင်း သက်သေထွက်ဆိုထားတာကိုတွေ့ရပါတယ်။

မြန်မာနိုင်ငံရဲ့ လက်ရှိအကျပ်အတည်းအတွက် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) က လူသားချင်းစာနာထောက်ထားမှု အကူအညီများ တိုးမြှင့်ပေးရန် နိုင်ငံတကာ အသိုင်းအဝိုင်းထံ တောင်းဆိုခဲ့သော်လည်း တစ်ဖက်တွင်မူ ဆွီဒင်နိုင်ငံက မြန်မာ့ဖွံ့ဖြိုးရေးဆိုင်ရာ ကူညီထောက်ပံ့မှုများကို ရပ်ဆိုင်းတော့မည်ဖြစ်ကြောင်း စက်တင်ဘာလ ၁၂ ရက်နေ့ကထုတ်ပြန်ခဲ့ပါတယ်။

UNHCR မဟာမင်းကြီး ဖိလစ်ပို ဂရန်ဒီဟာ မြန်မာနိုင်ငံအတွင်း သုံးရက်ကြာ နေထိုင်ခဲ့ပြီး ပြည်တွင်းနေရပ်စွန့်ခွာရသူများနှင့် ငလျင်ဒဏ်သင့် ဒေသခံလူမှုအသိုင်းအဝိုင်းများထံ သွားရောက် လေ့လာချက်များအရ အကူအညီများ အရေးတကြီးလိုအပ်နေကြောင်းနဲ့ နိုင်ငံတကာမှ တိုးမြှင့်ကူညီပေးရန် လိုအပ်ကြောင်း UNHCR က ထုတ်ပြန်ချက်တွင် ဖော်ပြထားပါတယ်။

UNHCR ရဲ့ မြန်မာနိုင်ငံအတွက် လူသားချင်းစာနာမှုလုပ်ငန်းများ ဆောင်ရွက်နိုင်ရန် အမေရိကန်ဒေါ်လာ ၈၈.၃ သန်း လိုအပ်သော်လည်း ယခုအချိန်အထိ လိုအပ်ချက်၏ ၃၃ ရာခိုင်နှုန်း သာ ရရှိသေးကြောင်း ဖော်ပြထားပါတယ်။

“ပြည်တွင်းမှာ နေရပ်စွန့်ခွာနေထိုင်ကြရတဲ့ သန်းနဲ့ချီတဲ့ ပြည်သူတွေနဲ့ ဒေသတွင်းရှိတဲ့ ဒုက္ခသည်တွေ နေရပ်ပြန်နိုင်ရေးလိုအပ်ပြီး သူတို့ရရှိပိုင်ခွင့်ရှိတဲ့ ငြိမ်းချမ်းရေးနဲ့အတူပါလာတဲ့ ဘေးကင်းမှုနဲ့ လုံခြုံမှုကို တောင်းဆိုကြတယ်။ နိုင်ငံတကာအသိုင်းအဝိုင်းနဲ့ သက်ဆိုင်ရာအဖွဲ့အစည်းအားလုံးတို့က မြန်မာနိုင်ငံ အကျပ် အတည်းကို အဖြေရှာရန် အလေးအနက်ထား ပူးပေါင်းဆောင်ရွက်ကြရမယ်” လို့ မဟာမင်းကြီးက ပြောကြားခဲ့တယ်လို့ ဖော်ပြထားပါတယ်။

မြန်မာနိုင်ငံကို ဖွံ့ဖြိုးရေးအကူညီများပေးအပ်သော ဥရောပသမဂ္ဂအဖွဲ့ဝင် ဆွီဒင်နိုင်ငံက လာမည့် ၂၀၂၆ ခုနှစ်တွင် ကူညီမှုများရပ်ဆိုင်းမည်ဖြစ်ကြောင်း စက်တင်ဘာ ၁၁ ရက်နေ့က ထုတ်ပြန်ထားပါတယ်။

ဆွီဒင်နိုင်ငံဟာ မီဒီယာနဲ့ လူ့အခွင့်အရေးအဖွဲ့များအတွက် တစ်နှစ်လျှင် ဒေါ်လာ ၂ ဒသမ ၆၅ သန်းခန့်ထောက်ပံ့ခဲ့ပြီး ယခုကဲ့သို့ ဖြတ်တောက်မှုကြောင့် ထိခိုက်နစ်နာဆုံးရှုံးများ ဖြစ်ပေါ်နိုင်ကာ မြန်မာနိုင်ငံအတွင်းရှိ ပြည်သူ့လူမှုအဖွဲ့အစည်းများ၊ သတင်းထောက်များနှင့် လူ့အခွင့်အရေး ကာကွယ်ရေးသမားများအတွက် ထိခိုက်နစ်နာမည်ဖြစ်ကြောင်း Human Right Myanmar ထုတ်ပြန်ချက်တွင် ပါဝင်ပါတယ်။

မြန်မာနိုင်ငံရှိပြည်သူများနဲ့ ဒေသအတွင်းရှိဒုက္ခသည်များကိုကူညီနိင်ရန်အတွက် နိုင်ငံတကာ အသိုင်း အဝိုင်းထံမှ ပိုမိုကြီးမားသောငွေကြေးပံ့ပိုးမှုလုပ်ဆောင်ပေးရန် လိုအပ်လျက်ရှိနေပါတယ်။

ပြည်ပနိုင်ငံများကိုရောက်ရှိနေကြတဲ့ မြန်မာနိုင်ငံသားများ ကြိုတင်မဲပေးရန် စစ်ကောင်စီရွေးကောက်ပွဲ ကော်မရှင်ကရက်ထပ်တိုးပေးထားတယ်လို့ ထုတ်ပြန်ကြော်ငြာထားပါတယ်။

၂၀၂၅ခုနှစ် စက်တင်ဘာလ ၁၂ ရက်နေ့က စစ်ကောင်စီရွေးကောက်ပွဲကော်မရှင်က ပြည်ပနိုင်ငံရောက်မြန်မာနိင်ငံသားများကို ကြိုတင်မဲပေးရန် ရက်ထပ်တိုးပေးထားတယ်လို့ ထုတ်ပြန်ထားပါတယ်။

“စိတ်ကို မဝင်စားတာ။ အရင်က ဆိုရင်တော့ ပေးချင်လွန်းလို့ကို မဲစာရင်းကိုစောင့်ပြီး ကိုယ့်နာမည်စာရင်းပါ၊ မပါ စောင့်ကြည့်ပြီးရင်ခုန်ရတယ်။ နာမည်စာရင်းပါလာရင် Online Q နံပါတ်ယူကြနဲ့၊ တက်ကြွကြတယ်။ အမှန်အတိုင်းပြောရင် ရက်တိုးတာ သိလည်း စိတ်လည်းဝင်စားမနေဘူး။ ထင်တာက လာပေးတဲ့သူများအောင်လို့။ အခုက ဘယ်သူမှ စကားထဲတည့်ပြောနေတာ မတွေ့ကြရဘူး”လို့ စက်ာပူနိင်ငံရောက်မြန်မာနိင်ငံသားတစ်ဦးက BBM ကိုပြောပါတယ်။

“”ကိုယ့်နိုင်ငံက ရွေးကောက်ပွဲဆိုပေမယ့် ဒီစစ်အာဏာရှင်လုပ်တဲ့ အတုအယောင်ရွှေးကောက်ပွဲကို စိတ်မဝင်စားဘူး အားလည်းမပေးဘူး ကြိုတင်မဲလည်းမထည့်ဘူး””လို့ ထိုင်းနိုင်ငံရောက် စက်ရုံအလုပ်သမားတစ်ဦးကလည်း ပြောပြပါတယ်။

“”ရွှေးကောက်ပွဲ လည်းစိတ်မဝင်စားဘူး အဓိကအမေစုအမြန်ဆုံးပြန်လွတ်ဖို့နဲ့ အမြန်ဆုံးကျန်းမာရေးကောင်းဖို့ပါပဲ၊ ဒီမှာတော့ မြန်မာနိုင်ငံသားတွေစုပြီးအမြဲဆန္ဒပြကြတယ်””လို့ တောင်ကိုရီးယားရောက် အလုပ်သမားတစ်ဦးကလည်း ပြောပြပါတယ်။

စစ်ကောင်စီက ရွေးကောက်ပွဲ ပထမပိုင်းကို ဒီဇင်ဘာလကုန်ခါနီးမှာကျင်းပမယ်လို့ကြော်ငြာထားပြီး ပြည်ပနိုင်ငံရောက်မြန်မာနိုင်ငံသားများကို ကြိုတင်မဲပေးဖို့ မြန်မာသံရုံးများမှတဆင့်ဖောင်များထုတ်ပေးထားတယ်လို့ သိရပါတယ်။

“CP ကြက်စာဈေး မြင့်တက်လာတဲ့အပြင် ကြက်ခြံပြု ပြင် တည်ဆောက်ရတဲ့ ဝါးဓနိကအစ ဈေးတက်တယ်၊ အခြားဝန်ဆောင်မှုစရိတ်တွေက များလာတယ်၊ ပျက်စီးဆုံးရှုံးမှုဖြစ်ရင် ပြန်မတည်ဖို့ကခက်ခဲကြလို့ ရင်းနှီးမြှုပ်နှံမှုကို လျော့ထားကြတယ်”

လို့ မှော်ဘီမှ ကြက်မွေးမြူရေးလုပ်ငန်းရှင်တဦးက BBM ကိုပြောပါတယ်။ ရန်ကုန်တိုင်း အတွင်းမှာအသားတိုး(အသားစား) CPကြက်မွေးမြူရေးလုပ်ငန်း တနိုင်တပိုင် လုပ်ကိုင်သူ နဲ့ စီးပွားဖြစ်လုပ်ကိုင်သူတွေ ထက်ဝက်နီးပါး လျော့ ကျလာပါတယ်။

CP အသားတိုး(အသားစား)ကြက်မွေးမြူရေးလုပ်ငန်း တနိုင်တပိုင် လုပ်ကိုင်သူ နဲ့ စီးပွားဖြစ်လုပ်ကိုင်သူတွေ ၄၃ ရာခိုင်နှုန်းနီးပါး လျော့ကျလာတယ်လို့ တိ/ မွေးကု ဦးစီးဌာနရဲ့ ဩဂုတ်လ မှတ်တမ်းအရ သိရပါတယ်။

အသားတိုး(အသားစား)ကြက်မွေးမြူရေးလုပ်ငန်း ရဲ့ ရင်းနှီးမြှုပ်နှံမှု ၇၀ ရာ ခိုင်နှုန်း ဖြစ်ပြီးပြည်ပက တင်သွင်းရတဲ့ CPကြက်စာတွေ ဈေးနှုန်းတက်ပြီး ဝယ်ယူရခက်ခဲတာ၊ ပြည်တွင်းဖြစ် အစားထိုးကြက် စာတွေ ဖြစ်တဲ့ ဖွဲနု၊ စကွဲ ၊ပြောင်းဆံ ၊ပဲပုပ်ဖတ်တို့ ထုတ်လုပ်မှုနှုန်းကျပြီး ဈေးတက်လာတာကြောင့် အသား တိုး(အသားစား)ကြက်မွေးမြူရေးလုပ်ငန်း လုပ်ကိုင်သူတွေ လျော့ကျလာတယ်လို့ သိရပါတယ်။

အသားတိုး(အသားစား)ကြက်မွေးမြူရေး လုပ်ငန်းဟာ ၄၅ ရက် အချိန်တိုအတွင်း ငွေပြန်ပေါ်နိုင်တဲ့ လုပ်ငန်းမျိုးဖြစ်ပေမယ့် ရင်းနှီးမြှုပ်နှံမှုကြီးမားပြီး ကြက်တွေရောဂါပိုးဝင်လို့ ခြံလုံးပြုတ်ပျက်စီးတာ၊ ငွေကြေး ၊ သွင်းအားစု ဈေးနှုန်း နဲ့ ဒေသတွင်း နိုင်ငံ ရေး စစ်ရေး မတည်ငြိမ်တာတွေ ၊တရားဥပဒေ စိုးမိုးမှု မရှိတာတွေက အသားတိုးကြက်မွေးမြူရေး လုပ်ငန်း ရဲ့ အမှားမခံ နိုင်တဲ့ စိန်ခေါ်မှုတွေပါ။

အသားတိုး(အသားစား)ကြက်မွေးမြူရေး လုပ်ငန်းတွေ လျော့ကျလာတာ ကြောင့် ကြက်သား ထုတ် လုပ်မှုလျော့ကျပြီး ကြက်သားရောင်း လက်လီ ဈေး နှုန်းတွေကလည်း တပိသာ တသောင်းလေးထောင် ဈေးကနေ တပိသာ နှစ် သောင်း ဈေးအထိ မြင့်တက်လာပါတယ်။

“ကြက်သားဈေးကတက်လာတယ် ပြီးတော့ အချို့တွေက စီပီကြက်သားကို ကျန်းမာရေး နဲ့မညီညွှတ် ဘူး ဆိုပြီး သိပ်ဝယ်မစားကြဘူး၊ စားသုံးတာ နည်း လာတယ်၊ကြက်သားကို ပုံမှန် ဝယ်ချက်စားနေကြတာ မဟုတ်ဘူးလေ အဲတော့ ပစ္စည်းကျန်တဲ့အခါ ငွေပေါ် ဈေးလျော့ရောင်းရတော့ အရှုံးပေါ် တော့ တာပါပဲ”

လို့ ကြက်သားလက်လီလက်ကားရောင်းချသူတစ်ဦးက ပြောပါတယ်။ ပြည်ပကနေ သားပေါက်တွေ တင်သွင်းမွေးမြူတဲ့ စီပီကြက်သား မစားလိုသူတွေဟာ သဘာဝအစာတွေ နဲ့ မွေးမြူတဲ့ ကြက်နီ ၊ငွေနားဖြူ၊ စစ်တကောင်း စတဲ့ ဗမာကြက်သား တွေကို ဝယ်ယူ စားသုံး ကြတဲ့ အ တွက် ဗမာကြက်သား လက်လီလက်ကားရောင်း ဈေးကလည်း တစ်ပိသာ ကျပ် ၃၂၀၀၀ အထိ ဈေးတက်လာပါတယ်။

မှော်ဘီ၊ တိုက်ကြီးမြို့နယ်တို့ အပါအ ဝင် ရန်ကုန်တိုင်းအတွင်း က မွေးမြူထုတ်လုပ်တဲ့ စီပီကြက် နဲ့ ဗမာကြက် အရှင်တွေ ကို ဒေသတွင်း မှာ ရောင်းဝယ် ဖေါက်ကားရုံသာမက ပုဇွန်တောင်မြို့နယ် ကြက်/ ဘဲဈေးကွက်ကိုလည်းတင်ပို့ရောင်းချကြတယ်လို့ သိရပါတယ်။